प्रधानन्यायाधीश सिफारिसका लागि संवैधानिक परिषद्को बैठक बस्दै

१६ साउन, काठमाडौं । संवैधानिक परिषद्को बैठक आज बस्दैछ । अपराह्न ४ बजे सिंहदरबारमा बस्ने बैठकले नयाँ प्रधानन्यायाधिश नियुक्तिका लागि नाम सिफारिस गर्नेछ । 

प्रधानन्यायाधीश हरिकृष्ण कार्की उमेर हदका कारण यही साउन २० गते नियमित अवकाशमा जाँदैछन् । पदावधि सकिन एक महिना बाँकी छँदै नयाँ प्रधानन्यायाधीश सिफारिस गर्नुपर्ने संवैधानिक व्यवस्था रहेको छ । उनी गत असार १ गते प्रधानन्यायाधीश नियुक्ति भएका थिए । दलहरूबीच लामो समय सहमति जुटन नसक्दा कार्की १६ महिना बढी कायममुकायम (कामु) प्रन्या रहेका थिए ।

गएकाे असार १९ मा नै प्रस्तावित प्रधानन्यायाधीशको नाम सिफारिस हुनुपर्नेमा बैठक बोलाउन ढिलाइ भएको हो । सर्वाेच्च अदालतमा ३ वर्ष पूरा न्यायाधीश भएका न्यायाधीशहरू प्रन्या नियुक्तिका लागि याेग्य हुने व्यवस्था छ । तर, हालसम्म सर्वोच्च अदालतका वरिष्ठतम न्यायाधीशलाई नै प्रधानन्यायाधीशमा सिफारिस गर्ने परम्परा छ ।

परिषद्का अध्यक्ष प्रधानमन्त्री रहने व्यवस्था छ । परिषद् सदस्यहरुमा प्रधानन्यायाधीश, प्रतिनिधिसभाका सभामुख, उपसभामुख, राष्ट्रिय सभाका अध्यक्ष, प्रमुख प्रतिपक्षी दलका नेता रहने व्यवस्था छ । पदेन सदस्य रहने कानून मन्त्री धनराज गुरुङ हाल देशबाहिर छन् ।

बैठकले रोलक्रममा आधारमा वरिष्ठतम् न्यायाधीश विश्वम्भरप्रसाद श्रेष्ठलाई प्रधानन्यायाधीशमा सिफारिस गर्ने निश्चितप्रायः छ ।

यसैबीच प्रन्या कार्कीको कार्यकाल सर्वोच्च, उच्च र जिल्ला अदालतमा रिक्त रहेका न्यायाधीश नियु्क्तिबिनै सकिने भएको छ । नियुक्तिलगत्तैदेखि नियुक्तका लागि उनले पटकपटक न्यायपरिषद्को बैठक बोलाएपनि निर्णय गराउन सकेका छैनन् ।