अझै सुरु भएन प्रतिनिधिसभा बैठक, कार्य व्यवस्था बैठकमा के भए छलफल ?

१६ साउन, काठमाडौं । आज अपरान्ह १ बजेका लागि बोलाइएको प्रतिनिधिसभाको बैठक अझै सुरु हुन सकेको छैन । प्रमुख प्रतिपक्षी नेकपा (एमाले)ले सुन प्रकरणमा छानबिनका लागि संसदीय समिति गठन गर्नुपर्ने अडान राखेका कारण दलहरुबीच बैठक संचालन गर्नेबारे सहमति जुटन नसक्दा बैठक बस्न नसकेको हो । 

बैठकअघि सहमति जुटाउन सुभामुख देवराज घिमिरेले राखेको कार्य व्यवस्था समितिको बैठकमा एमालेले बैठक चल्न दिनेबारे केही लचिलो प्रस्ताव ल्याएको छ । तर सरकार पक्षले भने लचिलो बन्दै एमालेले अघि सारेको छानबिनका लागि विशेष समिति बैठक बोलाउने प्रस्तावप्रति मौन बसेको छ । 

कार्यव्यवस्था समितिको बैठक सकिएको छ । बैठकमा एमालेले छानबिनका लागि विशेष समिति बैठक बोलाउन प्रस्तावमा सरकार पक्ष सहमत भए बैठक चल्न दिने जनाएको छ । एमालेकै कारण हिजो सोमबार बैठक बस्दै नबसी सूचना टाँस गरी आज बस्ने गरी सारिएको थियो ।

विशेष समितिको बैठक बोलाउन समेत सरकार पक्ष तयार नभए आजको प्रतिनिधिसभा बैठक अवरोध गर्ने एमालेका प्रमुख सचेतक पदम गिरीले बताए । त्रिभुवन अन्तर्राष्ट्रिय विमानस्थलबाट १०० केजीभन्दा सुन भन्सार चेकजाँचबाट तस्कारले सजिलै छिराएको भनिएको घटनामा छानबिनका लागि संसदीय समिति बनाउनुपर्ने माग गर्दै एमालेले निरन्तर बैठक अवरुद्ध पार्दैै आइरहेको छ । सरकारले भने घटनामाथि भन्सार कार्यालय र सीआईबीले केही अभियुक्त पक्राउ परी अनुसन्धान गरिरहेको अवस्थामा संसदीय समिति बनाउन आवश्यक नरहेको तर्क गर्दै आइरहेको छ ।

सोमबारसम्म पनि एमाले संसदीय छानबिन समिति गठन नै अन्तिम बटमलाइन रहेको बताउँदै आएकामा आज केही हदसम्म लचिलो बनेको संकेत मिलेको छ । उसले विशेष समितिको बैठकमा सुन प्रकरणमा छानबिन गर्न अनुसन्धान समिति बनाउन प्रस्ताव गर्ने तयारी गरेको छ ।

यसअघि पनि एमालेले प्रधानमन्त्री प्रचण्डले भारतीय नागरिक सरदार प्रितम सिंहबारे दिएको अभिव्यक्तिलाई लिएर पटकपटक संसद बैठक अवरुद्ध पारेको थियो । पछि प्रचण्डले रोष्ट्रमबाट सदनमा प्रष्टिकरण दिएपछि अवरोध हटेको थियो । हरेक विषयमा संसद अवरुद्ध पार्न थालेपछि एमालेको चौतर्फी आलोचना हुँदै आएको छ ।