कसका कारणले पटक पटक सदनको गतिरोध लम्बियाे [ हेर्नुस भिडियो ]

१६ साउन, काठमाडौं । नेकपा एमालेका सचेतक महेश वर्तौलाले सरकारका कारण सदनको गतिरोध लम्बिएको आरोप लगाएका छन् । मंगलबार संसद भवन नयाँ बानेश्वरमा सञ्चारकर्मीसंग कुरा गर्दै वर्तौलाले सुन तस्करी प्रकरणमा उच्चस्तरीय छानबिन समिति बनाउनुपर्ने एमालेको माग सरकारले अस्वीकार गरेका कारण सदनको गतिरोध लम्बिएको आरोप लगाएका हुन् ।

उनले सदन सूचारु गरेर एमालेले आफ्नो धारणा राख्ने र सम्बन्धित मन्त्रीहरूको जवाफका आधारमा आगामी कदम चाल्ने तयारी गरेपनि सरकार पक्ष नै सुचना टाँस गरेर सदन स्थगीत गर्ने पक्षमा देखिएको बताए । कार्य व्यवस्था परामर्श समितिमा पनि कुनै पनि हालतमा उच्चस्तरीय छानबिन समिति नबनाउने अडान सरकार पक्षले राखेको उनले बताए ।

त्यस्तै कांग्रेस सांसद प्रदीप पौडेलले सदनमा छलफल गर्न नदिने र छानविन समिति पनि नवनाउदा सदन चल्न नसकेको बताए । उनले अव सुन तस्करी प्रकरणमा छानबिन समिति बनाउनुपर्ने र प्राविधिक पक्षलाई पनि समावेश गरेर निर्मम ढंगले छानबिन गर्नुपर्ने बताए । पौडेलले सुन प्रकरण सामान्य विषय नभएकाले सम्बन्धित पक्षले हल्का ढंगले लिन नहुने भन्दै राज्यले नै सत्य तथ्य छानबिन गर्नुपर्ने धारणा राखे ।

त्यस्तै माओवादी केन्द्रका सांसद माधव सापकोटाले सदनमा उठेका कुराहरुलाई सम्बन्धित मन्त्रीहरूले जवाफ दिने वातावरण बनाउनुपर्ने उल्लेख गरेका छन् । उनले राज्यका निकायहरुले सुन प्रकरणमा छानबिन गरिरहेको अवस्थामा ती निकायहरूलाई विश्वास नगरि अर्को छानबिन समिति गठन गर्न नहुने बताए ।