कोशी प्रदेशका सभामुख गौतमद्वारा राजीनामा

१६ साउन, काठमाडौं । कोशी प्रदेशसभाका सभामुख बाबुराम गौतमले पदबाट राजीनामा दिएका छन् । काठमाडौंबाट केहीबेर अघिमात्र विराटनगर पुगेका उनले उपसभामुखलाई सम्बोधन गर्दै लेखेको राजीनामा पत्र प्रदेशसभा सचिवालयमा बुझाएका छन् । 

माओवादी केन्द्रबाट निर्वाचित भएका गौतमले नयाँ सरकार गठन गर्न सत्ता गठबन्धनको पक्षमा बहुमत पुर्‍याउन पदबाट राजीनामा दिएका हुन् । आज उनले काठमाडौंमा आफ्ना पार्टीका अध्यक्ष समेत रहेका प्रधानमन्त्री प्रचण्डसँग भेटेका थिए । 

राजीनामासँगै उनले प्रदेशमा नयाँ सरकार गठनका लागि सत्ता गठबन्धन दलले उठाउने मुख्यमन्त्रीका उम्मेदवारलाई समर्थन गरेर प्रदेश प्रमुखसमक्ष आजै पेस गरिने दाबी निवेदनमा हस्ताक्षर गर्नेछन् । 

यसअघि उनले सभामुख पदमै रहेर सरकार गठनमा हस्ताक्षर गरेका कारण मुख्यमन्त्री उद्वव थापालाई सर्वोच्च अदालतले पदबाट बर्खास्त गरिदिएको थियो । बर्खास्तपछि प्रदेश प्रमुख परशुराम खापुङले आज बेलुका ५ बजेसम्मको समय तोकेर मुख्यमन्त्रीका लागि दाबी आह्वान गरेका छन् ।