सामाखुसी क्षेत्रमा तत्काल ढल व्यवस्थापन गर्नुपर्ने पूर्वाधार विकास समितिको निर्णय

१६ साउन, काठमाडौं । प्रतिनिधिसभा अन्तर्गतको पूर्वाधार विकास समितिले सामाखुसी खोलामा बाढीले बगाउँदा बेपत्ता भएका विधान आलेमगर (साजन) को निजको खोजी कार्य तीब्र गर्न सरकारलाई निर्देशन दिएको छ ।  

सिंहदरबारमा मंगलबार बसेको समिति बैठकले साउन ७ गते सामाखुसी खोलामा बाढीले बगाउँदा बेपत्ता भएका आले मगरको खोजी कार्य तीब्र गर्न र परिवारलाई राहत र क्षतिपूर्तिको यथोचित प्रबन्ध यथाशीघ्र गर्न गृहमन्त्रालयलाई अनुरोध गर्ने निर्णय गरेको हो ।

बैठकले भौगर्भिक संवेदनशीलता नबुझी बढेका अव्यवस्थित बस्ती, नदी किनारमा बस्ती, अनियन्त्रित नदी दोहन, अव्यवस्थित निर्माण कार्य र विद्यमान भू–उपयोग ऐनको कार्यान्वयन नहुँदा यस्तो घटना दोहरिएको भन्दै यस्ता दुर्घटनाहरु हुन नदिन यथोचित कदम चाल्न भूमि व्यवस्था सहकारी तथा गरिवी निवारण मन्त्रालयलाई अनुरोध गर्ने निर्णय पनि गरेको छ भने सामाखुसी खोलाको बाढीलाई अस्थायी रुपमा नियन्त्रण गर्न भौतिक पूर्वाधार तथा यातायात मन्त्रालय अन्तर्गत रहेको रिंगरोड बिस्तार आयोजनालाई रिंगरोडको दायाँ बायाँ ढल निकासका लागि अनुरोध गर्ने निर्णय बैठकले गरेको छ ।

बैठकमा भौतिक पूर्वाधार तथा यातायात मन्त्री प्रकाश ज्वालाले सडक, ढल, पूर्वाधार विकास लगायतका काम फरक फरक निकायले हेर्ने गर्दा समन्वयमा समस्या भएको भन्दै सम्बन्धित निकायलाई एकैस्थानमा ल्याउनुपर्ने बताउनुभयो । यस्ता घटना दोहरिन नदिन मन्त्रालयले गम्भीर भएर छलफल गर्ने धारणा राखे ।

त्यस्तै बैठकमा समिति सदस्यहरूले ढल निर्माण गरेर अलपत्र छाड्ने प्रवृत्तिको अन्त्य हुनुपर्नेमा जोड दिएका थिए । समिति सदस्य प्रदीप पौडेलले बर्खामा हरेक बर्ष सामाखुसीमा यस्ता घटना भइरहेको भन्दै ढल व्यवस्थापनको दीर्घकालिन समाधान खोज्नुपर्ने सुझाव दिए ।

त्यस्तै समिति सदस्य ठाकुर गैरेले बेपत्ता भएका बिधान आले मगरको तीव्रताका साथ खोजी कार्य जारी राख्नुपर्ने बताए । उनले विधान आले मगरको खोजीमा ध्यान दिनुपर्ने भन्दै अहिले नै मृत्युको घोषणा गर्न हतार गर्न नहुने उल्लेख गरे ।

काठमाडौंको पानीपोखरीको भानुभक्त मेमोरियल स्कुलमा कक्षा ६ मा अध्ययनरत निज बालक साउन ७ गते साँझ फुटसल खेल्न जाँदै गर्दा पर्खालबाट खसेर सामाखुसी खोलामा बगेर बेपत्ता भएका थिए । बेपत्ता भएको ९ दिन बित्दासमेत उनी अझै फेला पर्न सकेका छैनन् ।