उपराष्ट्रपति यादवले गरे ११० फिट अग्लो राष्ट्रिय झण्डा अनावरण

१६ साउन, काठमाडौं । उपराष्ट्रपति रामसहाय प्रसाद यादवले महोत्तरीमा ११० फिट अग्लो राष्ट्रिय झण्डा अनावरण गरेका छन् ।

उनले जिल्लाको मटिहानी नगरपालिका–७ स्थित तस्मैया बाबा उद्यानमा निर्मित ११० फिट अग्लो पोलमा राखिएको झण्डा आज बिहान अनावरण गरेका हुन् । अनावरणपछि उनले राष्ट्र ध्वज स्थापना गरी यहाँका जनताले राष्ट्रप्रति उच्च अपनत्व प्रकट गरेको बताए । देशभक्त मधेश जनताको जीवन सहज बनाउन राज्यले हर तरहले सहयोग गर्नुपर्ने बताए । 

तराई–मधेश सुख्खा क्षेत्रमा परिणत भएको भन्दै चिन्ता समेत व्यक्त गरे । पानी नपर्दा मधेश प्रदेशका महोत्तरी, धनुषा लगायत जिल्लामा विभिन्न स्थानमा अझै धान रोपाई हुन सकेको छैन । रोपाई नहुँदा चामलको संकट निम्तिने त्रास यहाँ किसानमा परेको छ । 

झण्डा अनावरण कार्यक्रममा मधेश प्रदेशका मुख्यमन्त्री सरोजकुमार यादव, प्रदेश सरकारका मन्त्री, प्रदेशसभा सदस्य लगायत उपस्थित थिए ।