सीडीओ कार्यालय परिसरमा विष सेवन गरेका मिटरब्याज पीडितको ज्यान गयो

१७ साउन, काठमाडौं । मोरङको जिल्ला प्रशासन कार्यालय परिसरमा विष सेवन गरेका मिटरब्याज पीडितको ज्यान गएको छ । यही साउन ७ गते जिल्ला प्रशासन कार्यालय मोरङमा पीडक (मिटरब्याजीसँग) भएको छलफल कार्यक्रमपछि बाहिरिने क्रममा परिसरमै विष सेवन गरेका विनित सोनारको उपचारका क्रममा नोबेल अस्पतालमा ज्यान गएको हो । 

ज्यान गुमाउने ३२ वर्षीय सोनार कटहरी गाउँपालिका–३ का बासिन्दा भएको खुलेको छ । उपचारका क्रममा उनको आज बिहान मृत्यु भएको प्रहरीले जनाएको छ । सोनार मिटरब्याजी नितेष तिवारीबाट पीडित थिए । उनकी श्रीमती रीता सोनारले  मिटरब्याजी तिवारी विरुद्ध जिल्ला प्रशासनमा उजुरी दिएकी छन् । त्यसमाथि दुवै पक्षबीच छलफल गराउने क्रम चलिरहेका बेला विष सेवन गरेका थिए ।

विनितले व्यवसाय गर्न तिवारीबाट ४ वर्ष पहिले ७ लाख ऋण लिएको र त्यसमा १५ लाख तिरिसकेको अवस्थामा तिवारीले १२ लाखको थप दाबी गरेपछि विनित तनावमा परेका थिए । छलफलमा तिवारीले अडान नछाडेपछि पीडित विनितलाई प्रहरीले पक्राउ गरेको र त्यस क्रममा उनले विष सेवन गरेका थिए ।