केन्द्रीय समिति बैठकमा प्रचण्डले भने- समाजवाद प्राप्तिका लागि समावजादी मोर्चा बनायाैं

१७ साउन, काठमाडौं । सरकारको नेतृत्व गरिरहेको नेकपा (माओवादी केन्द्र)का अध्यक्ष एवं प्रधानमन्त्री प्रचण्डले पार्टीले विगतमा केही कमजोरी गरेको बताएका छन् ।

उनले आज काठमाडौंको कमलादीमा सुरु भएको केन्द्रीय समितिको चाैथाे पूर्ण बैठकको उद्घाटन सत्रमा बोल्दै पार्टीले विगतमा एमालेसँग भएको पार्टी एकीकरणमा कमजोरी गरेको स्वीकार गरे । 

उनले विगत कमी कजोरीलाई अहिलेको बैठकले समीक्षा र विश्लेषण गरेर दीर्घकालीन निर्णय लिनुपर्ने बताए । अहिले पार्टीको नेतृत्वमा चलिरहेको सरकारले सामाजिक न्याय, सुशासन र समृद्धिको पक्षमा गरिरहेको कामबाट जनतामा आशाको संचार प्रवाह भएपनि पार्टी भने पार्टी जस्तो हुन नसकेको बताए । उनले पार्टीमा हुने गल्ती र गरिने कमजोरीलाई सच्याउन र गल्ती स्वीकार्न जाेकाेही डराउन नहुने बताए । 

साथै उनले राष्ट्रिय एकता र स्वाधीनतालाई सुदृढ गर्नुपर्ने आवश्यकता रहेको बताउँदै केन्द्रीय बैठकबाट यसमा ठोस निर्णय लिने विश्वास व्यक्त गरे । उनले समाजवाद प्राप्तिका लागि समाजवादी मोर्चा गठन गरेर पार्टी अगाडि बढिरहेको समेत बताए । 

केही समयपहिले मात्र माओवादी केन्द्र, एकीकृत समाजवादी, जसपा र विप्लव नेतृत्वको नेकपा सम्मिलित समाजवादी मोर्चा नेपाल गठन गरेको छ । मोर्चाले केन्द्रदेखि वडा तहसम्म सांग संगठानिक संचरना तयार पारिरहेको छ ।