युवकलाई बिजुलीको पोलमा बाँधेर कुटपिट गरेको घटनामा संलग्नमध्ये एक जना पक्राउ

१७ साउन, काठमाडौं । गएको आइतबार दिउँसो रौतहटमा एक युवकलाई बिजुलीको पोलमा बाँधेर  कुटपिट गरेको घटनामा संलग्नमध्ये एक जनलाई पक्राउ गरेको छ । 

गौर नगरपालिका–३ पोखरिया टोलस्थित मस्जिद छेउमा सोही ठाउँका २० वर्षीय युवक प्रिन्स अन्सारीलाई वडाध्यक्ष सामुन्ने पोलमा बाँधेर एक समूहले कुटपिट गरेको थियो ।

घटनामा संलग्नमध्ये ३८ वर्षीय साजिद अन्सारीलाई प्रहरीले पक्राउ गरेको हो । कुटपिटको भिडियो सामाजिक संजालमा राखिएपछि अनुसन्धानका क्रममा साजिद पक्राउ परेको रौतहट प्हरीले जनाएको छ । घटनामा संलग्न अन्यको खोजी भइरहेको पनि प्रहरीले जनाएको छ ।

साजिदको छोरा र भाइ प्रिन्स अन्सारीबीच आइसक्रिम खरिद गर्ने विषयमा भएको विवादलाई लिएर साजिदसहितकाे समूहले पोलमा हात बाँधेर प्लास्टिकको पाइपले निर्मम रूपमा कुटपिट गरेको पीडितका दाई इलियास अन्सारीले बताएका छन् ।

उनले कुटपिटमा साजिदसहित हातिम अन्सारी, आविद अन्सारी,  आश मोहमद, सोनु अन्सारी लगायतकाे संलग्नता रहेकाे बताए ।