उच्च अदालतबाट निर्दाेष ठहर भएका लालबहादुर  झुम्का कारागारबाट रिहा

१७ साउन, काठमाडौं । ठगी मुद्दामा उच्च अदालत विराटनगरले निर्दोष ठहर गरिएका सुनसरीको इटहरी–१९ फुलबारीका लालबहादुर विक झुम्का कारागारबाट रिहा भएका छन् । निर्दोष ठहर भएपछि उनी बुधबार दिउँसो सुनसरीको झुम्काबाट रिहा भएका हुन् । 

अवैध बैंक तथा वित्तीय कारोबार तथा ठगी गरेको मुद्दामा सुनसरी जिल्ला अदालतले ९ महिनादेखि झुम्कामा कैदी जीवन बिताइरहेका थिए । उनले आफू निर्दोष रहेको र थुनामुक्तका दिएका रिटमा उच्च अदालत विराटनगरका न्यायधीशद्वय विपुल न्यौपाने र मिलनकुमार राईको संयुक्त इजलासले सफाइ दिएको थियो । 

उनलाई २०७८ पुस १९ मा सुनसरी जिल्ला अदालतकी तत्कालीन न्यायाधीश निर्मला योङहाङको इजलासले एक वर्ष ६ महिना कैद र ३ करोड १४ लाख ११ हजार रुपैयाँ जरिबाना तोकिएको थियो । 

विकलाई रिहाइका क्रममा परिवार र अभियन्ताहरुले अबिर र खादा लगाएर स्वागत गरेका थिए । कारागार परिसरमा स्वागत गर्ने मानिसहरुको भीड लागेको थियो । 

लालबहादुर इटहरी–२० स्थित स्थानीय दीपक गजमेरले सञ्चालन गरेको सिंहदेवी ज्वेलर्समा मजदुर (कालीगढ)को रूपमा काम गर्ने क्रममा गजमेरले चलाएको चर्को ब्याज पाउने लोभमा पासबुक बनाएर स्थानीयसँग गरेका रकम संकलनमा संलग्नताको आरोपमा पक्राउ परेका थिए ।