दुर्गमका २९ विमानस्थलमा साढे १२ बजेपछि उडान गर्न राेक

१८ साउन, काठमाडों । प्रतिकूल मौसमका कारण हुनसक्ने हवाई दुर्घटनाको जोखिम न्यूनीकरण गर्न दुर्गम क्षेत्रका २९ वटा विमानस्थलमा दिउँसो साढे १२ बजेपछि उडान बन्द गर्ने भएको छ । 

यो नियम जुलाईदेखि सेप्टेम्बरसम्म तीन महिना लागु हुने नेपाल नागरिक उड्डयन प्राधिकरणले जनाएको छ । यो नियम यही सोमबारदेखि लागू भएको यो नियम आगामी असोज १३ गतेसम्मका भएको प्राधिकरणले जनाएको छ । बन्द समयमा व्यवसायिक र चार्टर उडान गर्न नपाइने प्राधिकरणले जनाएको छ । 

प्राधिकरणका अनुसार ताप्लेजुङ, मनाङ, जोमसोम, फाप्लु, सिमकोट, भोजपुर, डोल्पा, थामखर्क, रारा, मसिनेचौर, बाजुरा, साँफेबगर, चौरजहारी, दाङ, रुम्जाटार, बैतडी, डोटी, टिकापुर, महेन्द्रनगर, इलाम, खिजिचण्डेश्वरी, गुल्मी, सल्ले, खानिडाडा, काँगेलडाडा, बाग्लुङ, दार्चुला र मेघौली विमानस्थलमा मध्यान्ह साढे १२ बजेपछि उडान गर्न निषेध गरिएको हो । त्यसअघि समय बिहान ६ः४५ देखि दिउँसो १२ः३० सम्म भने उडान गर्न पाइनेछ । नेपालगञ्ज विमानस्थलले खराब मौसमका कारण सिमकोटको उडान रोक्दै आएको छ ।

यसअघि प्राधिकरणको विमानस्थल सञ्चालन निर्देशिकाले ५ वर्षअघि यो नियम खुकुलो बनाउँदै वायुसेवाहरुलाई साढे १२ बजेपछि पनि व्यवसायिक र चार्टर उडान अनुमति  दिँदै आइरहेको थियो ।  हाल मुलुकभर रहेका ५२ वटा विमानस्थलमध्ये ३३ वटा मात्रै सञ्चालनमा छन् ।