माओवादी केन्द्रका अधिकांश नेता विशेष महाधिवेशनको पक्षमा

१८ साउन, काठमाडौं । सरकारले नेतृत्व गरिरहेको नेकपा (माओवादी केन्द्र)को जारी केन्द्रीय समितिको पूर्ण चाैथाे बैठकमा बोल्ने अधिकांश नेताहरुले विशेष महाधिवेशनको पक्षमा धारणा राखेका छन् । 

कमलादीस्थितप्रज्ञाभवनमा बुधबार सुरु भएको बैठकमा दुई दर्जन केन्द्रयि सदस्यहरुले धारणा राखेका छन् । त्यसमा धेरै जनाले पार्टीको विशेष महाधिवेशन गर्नुपर्ने बताएका छन् । पार्टी नेतृत्वको सरकारले राम्रा र जनपक्षीय काम गरिरहेको भन्दै प्रशंसा गरेपनि पार्टी कमजोर बन्दै गएको उनीहरुको तर्क थियो । विचार र कार्यदिशामा स्पष्टता नभएका कारण पार्टी पंक्ति नै अलमलमा परेको र यसबाट जनतासँगको सम्बन्ध कमजोर बन्दै गएको उनीहरुले बताए । 

केन्द्रीय सदस्य जयपुरी घर्तीले पार्टीको विधान अधिवेशन भन्दा विशेष महाधिवेशन गर्नुपर्ने बताइन् । उनीभन्दा अघि र पछाडि बोल्ने अधिकांश नेताहरुले पनि विशेष महाधिवेशनको माग गरे । सरकारले गरेका राम्रा कामको प्रचार फितलो भएको भन्दै संचार विभागलाई स्रोत साधनबाट बलियो बनाउन सुझाव दिए । बुधबार बैठकमा अध्यक्ष प्रचण्डले पेस गरेका राजनीतिक प्रतिवेदनमा विधान अधिवेशन आगामी मंसिरमा गर्ने प्रस्ताव राखिएको छ ।

वैद्यबाट गएका नेता लेखनाथ न्यौपानेले पार्टी नेतृत्व सच्चिनुपर्ने बताए । ‘पार्टीलाई पार्टीजस्तो बनाउने हो भने पार्टी नेतृत्व सच्चिनु जरुरी छ । अन्यथा, कम्युनिष्ट विलय भएजस्तै माओवादी पनि सिद्धिन बेर छैन’ न्यौपानेको भनाइ उद्धृत गर्दै एक नेताले बताए । न्यौपानेले माओवादी केन्द्रले संसदीय व्यवस्थालाई उपयोग गर्दै क्रान्तिको तयारी गर्नुपर्ने धारणा राखेका थिए । नेता न्यौपाने अध्यक्ष प्रचण्डको कडा आलोचक मानिन्छन् ।

बैठकमा हरेक केन्द्रीय सदस्यलाई छोटकरीमा धारणा राख्न दिने नीति तय गरिएको छ । माओवादी केन्द्रले केन्द्रीय सदस्य संख्या ४०९ पुर्याउने भएको छ ।