आँखा पाक्ने रोग फैलिएपछि जनकपुरधाम उपमहानगरका विद्यालय बन्द (सूचनासहित)

९ साउन, काठमाडौं । आँखा पाक्ने रोगको संक्रमण व्यापक बनेपछि धनुषाको जनकपुरधाम उपमहानगरका सम्पूर्ण विद्यालय एक साताका लागि बन्द गरिएको छ । अधिकांश विद्यार्थीमा आँखा पाक्ने रोग (एडिनो भाइरस कन्जन्टिभाइटिस)को संक्रम बढेपछि विद्यालय बन्द गरिएको हो । 

रोगबाट हुन सक्ने  थप जोखिम न्यूनिकरण गर्न आँखा अस्पतालको अनुरोधमा यही साउन २१ गतेदेखि २१ गतेसम्मका लागि विद्यालय बन्द गर्ने निर्णय गरिएको जनकपुरधाम उपमहानगरपालिकाका शिक्षा शाखा प्रमुख मिहिलाल यादवले जानकारी दिएका छन् । 

पालिकाका निमित्त प्रमुख प्रशासकीय अधिकृतले शुक्रबार एक सूचना जारी गर्दै नगरपालिकाभित्रका सबै शिक्षण संस्थाहरु बन्द गरिएको जानकारी दिएका छन् । सामाजिक दूरी कायम गर्न समेत सूचनामा भनिएको छ ।

उपमहानगरभित्रका सबै सामुदायिक तथा संस्थागत विद्यालय तथा शिक्षण संस्थाहरू बन्द गरिएको उनले बताए । आँखा पाक्ने रोग देशभर फैलिने क्रम रहेको जनाउँदै सतर्कता अपनाउन स्वास्थ्य मन्त्रालयले अनुरोध गर्दै आइरहेको छ ।