क्रिकेटर ज्ञानेन्द्र मल्लले लिए सन्यास

९ साउन, काठमाडौं । क्रिकेटर एवं राष्ट्रिय क्रिकेट टिमका पूर्वकप्तान ज्ञानेन्द्र मल्लले अन्तर्राष्टि्य क्रिकेट खेलबाट सन्यास लिएका छन् । उनले शुक्रबार काठमाडौंमा पत्रकार सम्मेन गरी क्रिकेटबाट सन्यास लिएको घोषणा गरेका हुन् ।

सन्यास घोषणाका क्रममा उनले आफूले क्रिकेटबाट सन्यास लिए पनि नयाँ जिम्मेवारीको सुरुवात भएको समेत बताए । तर नयाँ जिम्मेवारी के हो भन्नेबारे भने खुलाएनन् । उनले हाल राष्ट्रिय क्रिकेट टिम सशक्त र लयमा रहेको र उत्कृष्ट प्रदर्शन गर्न सक्षम रहेको बताए । 

संचारकर्मीहरुको प्रश्नको जवाफ दिँदै उनले आफ्नो खेलजीवनबाट बिदाई लिने अहिलेकै समय उपयुक्त रहेको बताए । 

क्रिकेटबाट बिदाई लिने घोषणा गर्दैगर्दा सम्मेलनमा भावुक बनेका उनले क्रिकेट खेल्न प्रोत्साहन गर्ने समकालीन, हारजितमा साथ र हौसला दिने समर्थकलाई धन्यवाद दिए । साथै खेल जीवनमा निरन्तर साथ दिने जीवनसंगिनीलाई सम्झिए ।

काठमाडाैंकाे भीमसेनस्थानका मल्लले क्रिकेट खेल पवित्र खेल भएकाे उल्लेख गर्दै आगामी दिन नेपाली क्रिकेट टिमलाइ निरन्तर साथ र हाैसला दिन पछि नहट्ने प्रतिवद्धता समेत व्यक्त गरे ।