विराटनगरका रोहित चौधरीको हत्यामा पेस्तोल उप्लब्ध गराउने गिराेहका सदस्य पक्राउ

१९ साउन, काठमाडौं । विराटनगर महानगरपालिका–५ का युवक रोहित चौधरीको हत्यामा संलग्नता रहेको आरोपमा प्रहरीले थप दुई जनालाई पक्राउ गरेको छ । उनीहरू घटना गराउन हतियार दिने गिराेहका सदस्य रहेकाे खुलेकाे छ ।

पक्राउ पर्नेमा धरानका २२ वर्षीय प्रकाश लिम्बू र विराटनगरका ३० वर्षीय अजय शर्मा रहेको सुनसरी प्रहरी प्रमुख प्रहरी उपरीक्षक (एसपी) प्रभु ढकालले जानकारी दिएका छन् । जन्मदिन मनाउने क्रममा घुमफिर गरेर विराटनगर फर्कने क्रममा साउन ५ गते २८ वर्षीय रोहितलाई लुटेरा धरानको सेउती पुलनजिकबाट साथमा रहेका युवतीलाई नियन्त्रणमा लिई लुटपाट गर्ने क्रममा प्रतिकार गर्दा समूहले पेस्तोलबाट गोली हानी हत्या गरेको थियो ।

उक्त पेस्तोल शर्माको समूहले उप्लब्ध गराएको अनुसन्धानमा देखिएको जनाइएको छ । हत्यामा फरकफरक समूह मिलेर एउटै योजनामा भएको पाएको प्रहरीको दाबी छ । गम्भीर घाइते अवस्थामा उद्धार गरी उपचारका क्रममा धरानस्थित वीपी अस्पतालमा रोहितको मृत्यु भएको थियो ।

प्रहरीका अनुसार लृटपाट र हत्याका लागि शर्माले लिम्बूलाई हतियार दिएको खुलेको छ । हत्यामा संलग्नताको आरोपमा यसअघि नै प्रहरीले समूहका नाइकेका रुपमा चिनिएका मोरङको लेटाङ नगरपालिका–१ का दीपक तिम्सिना र धरान उपमहानगरपालिका–१४ का अनसन तामाङलाई पक्राउ गरिसकेको छ ।

रोहितको हत्यापछि युवतीलाई कुटपिट गरी फरार भएका उनीहरुलाई युवतीले दिएको हुलियाका आधारमा प्रहरीले पक्राउ गरेको हो । हत्यामा अन्य व्यक्तिको पनि संलग्नता देखिएको र उनीहरुको खोजी भइरहेको प्रहरीले जनाएको छ । उनीहरू भारत छिरिसकेकाे अनुमान खाेजी भइरहेकाे जनाइएकाे छ ।

पक्राउ परेकामध्ये केही अभियुक्त यसअघि हत्या र लुटपाटमा कैद भुक्तान गरेर रिहा भएका सदस्य रहेकाे पाइएको छ ।