लुम्बिनीमा पनि भागबण्डा मिलाउन मन्त्रालय फुटाउने तयारी

२१ साउन, काठमाडौं । लुम्बिनी प्रदेशमा पनि सरकारमा सहभागी दलहरुबीच भागबण्डा पुर्याउन मन्त्रालय फुटाउने तयारी गरिएको छ । मन्त्रालय फुटाएर मन्त्रिपरिषद विस्तार गर्ने तयारीमा मुख्यमन्त्री डिल्लीबहादुर चौधरी लागेका छन् । 

साउनभित्रै मन्त्रालय फुटाएर २ वटा मन्त्रालय थप गरी मन्त्रिपरिषद् विस्तार गर्ने योजनामा प्रदेश सरकार रहेको लुम्बिनी प्रदेश सरकारका प्रवक्ता गृहमन्त्री सन्तोषकुमार पाण्डेले बताएका छन् । हाल प्रदेशमा १० मन्त्रालय छन् । थपिँदा १२ पुग्नेछन् । 

उद्योग, पर्यटन तथा यातायात व्यवस्था मन्त्रालय र सहरी विकास मन्त्रालय फुटाउने तयारी भइरहेको बताइएको छ । आजै मात्र बाग्मती प्रदेश सरकारले पर्यटन, उद्योग तथा सहकारी प्रशासन मन्त्रालय फुटाएर उपर्यटन र उद्योग तथा सामान्य प्रशासन मन्त्रालय बनाएको छ । 

लामो समयदेखि जिम्मेवारीविहीन अवस्थामा बिनाविभागीय रहेका कांग्रेसका रामकृष्ण चित्रकारलाई बागमतीले आजै मात्र उद्योग तथा सामान्य प्रशासन मन्त्रालयको जिम्मेवारी दिएको छ ।

लुम्बिनीमा भने हाल मख्यमन्त्री चौधरीसहित हाल ७ मन्त्री छन् । चाैधरी गएकाे बैशाख १५ मा मुख्यमन्त्री नियुक्त भएका थिए ।

अब कांग्रेसबाट ३ र माओवादी केन्द्रबाट ३ मन्त्री नियुक्ति गर्ने योजना चौधरीले गरेका छन् । माओवादी लुम्बिनी प्रदेश प्रमुख सचेतक इन्द्रजीत थारुले मन्त्रालय विभाजन गर्ने सहमति भइसकेको बताए ।

प्रधानमन्त्री प्रचण्डले प्रधानमन्त्री भएलगत्तै सरकारी खर्च घटाउन प्रदेशका मन्त्रालय संख्या व्यापक कटौती गर्ने घोषणा अनुरुप यसअघि एमाले सहभागी रहेको प्रदेश सरकारले एउटै प्रदेशमा ५ वटासम्म मन्त्रालय मर्च गरेको थियो ।