राष्ट्र बैंकद्वारा वित्तीय अनुशासन कायम नगर्ने तीन बैंकमाथि कारबाही, हिमालयन र कुमारीलाई कराेडमा नगद जरिवाना

२२ साउन, काठमाडौं । नेपाल राष्ट्र बैंकले तोकिएको वित्तीय नियमन र मापदण्ड विपरीत काम गरेको भन्दै तीन वटा वाणिज्य बैंकलाई कारवाही गरेको छ । ती बैंकले कर्जा निक्षेप अनुपात कायम गराउने विषयमा पनि नियम विपरीत काम गरेको पाइएको छ । राष्ट्र बैंकले गत आर्थिक वर्षको चौथो त्रैमासको वित्तीय विवरण हेरेर प्राइम कमर्सियल बैंक, कुमारी बैंक र हिमालयन बैंकलाई कारबाही गरेको हो । 

प्राइम कमर्सियल बैंकलाई अन्य शीर्षकमा तथा कुमारी बैंक र हिमालयन बैंकलाई कर्जा-निक्षेप अनुपात कायम नगरेकोमा कारबाही गरिएको हो । कुमारी बैंक र हिमालयन बैंक लिमिटेडलाई सीडीसी रेसियो कायम नगरेकोमा राष्ट्र बैंकले नगद जरिवाना नै गरेको छ । कुमारी बैंकलाई ५९ लाख ६३ हजार र हिमालयन बैंकलाई १ करोड ३९ हजार जरिवाना गरेको हो । साथै, प्राइम कमर्सियल बैंकलाई भने क्यापिटल एडोकेसी फ्रेमवर्क २०१५ अनुसार जोखिम भारित सम्पत्ति गणना गर्दा वास्तविक भन्दा कम गरेकोमा सचेत गराइएको छ ।

राष्ट्र बैंकबाट क, ख र ग वर्गका इजाजतपत्र प्राप्त संस्थाहरूलाई जारी गरिएको एकीकृत निर्देशन २०७९ को निर्देशन नं. २ कर्जा नोक्सानीको व्यवस्था कायम नगरेको, क्यापिटल एडुकेसी फ्रेमवर्क, २०१५ अनुसार जोखिम भारित सम्पत्ति गणना गर्दा वास्तविक भन्दा कम गरेको र इ.प्रा.नं.१५ र ०७९ को व्यवस्थाविपरीत प्रिमियम दर बढाई ब्याज असुल गरेकोले राष्ट्र बैंक ऐन, २०५८ को दफा १०० को उपदफा २९ क बमोजिम कारबाही र सचेत गराएको छ ।