नागढुंगा-नौबिसे सुरुङमार्गको रेस्क्यु टनेलको काम सम्पन्न

२२ साउन, काठमाडौं । दुई किलोमिटर ६ सय ८८ मिटर दूरीको नागढुंगा–नौबिसे सुरुङ मार्गको रेस्क्यु टनेलको काम सकिएको छ । २०७६ कात्तिक ४ गते शिलान्यास भई निर्माण थालिएको रेस्क्यु टनेल (आपत्तकालिन उद्धार) सुरुङ निर्माणको काम सफलतापूर्वक सोमबार सकिएको हो ।

काम पूरा भएको अवसर ‘ब्रेक थ्रु’मा सहभागी हुन सोमबार भौतिक पूर्वाधार तथा यातायात मन्त्री प्रकाश ज्वालासहितको टोली नागढुंगा पुगेको छ । काठमाडौं र धादिङ दुवैतर्फबाट खनिएको सुरुङ जोडिएको हो । जोडिएसँगै मन्त्री  ज्वाला, सचिवहरु र निर्माणमा संलग्न अधिकारी र इन्जिनियरहरुले खुसी साटासाट गरे । 

मुख्य टनेलको काम पनि अब १८ प्रतिशत मात्र बाँकी रहेको आयोजनाले जनाएको छ । काम सकेर संचालनमा आउन कम्तिमा डेढ वर्ष लाग्ने सडक विभाग वैदेशिक महाशाखाले जनाएको छ । 

नागढुंगा जाम कम गराउने उद्देश्यले सरकारले सुरुङ मार्गको योजना अगाडि बढाएको हो ।

सुरुङमार्गमा ‘सुरुङ र सडक गरी कुल ५ दशमलब १३ किलोमिटर लामो तीन लेनको हुनेछ । उपत्यका प्रवेश गर्ने सवारीसाधन दुई लेनबाट यात्रा गर्नेछन् भने बाहिरिने सवारीसाधन एक लेनबाट जाने व्यवस्था हुनेछ ।