सुन तस्करी प्रकरणमा व्यवसायिक र उच्च राजनीतिक संलग्नता पुष्टि गर्न दुबै मोबाइल फरेन्सिक ल्याबमा पठाइयो

२४ साउन, काठमाडौं । त्रिभुवन विमानस्थलबाट बरामद भएको सय किलो सुन तस्करी प्रकरणको छानबिनको जिम्मा पाएको प्रहरीको केन्द्रीय अनुसन्धान ब्यूरो (सीआईबी) ले पक्राउ परेका चिनियाँ मूलका भारतीय नागरिक थुप्तेन छिरिङ र चिनियाँ मूलका बेल्जियमका नागरिक दावा छिरिङको मोबाइल परीक्षणका लागि प्रहरीको डिजिटल फरेन्सिक ल्याबमा पठाइएको छ । 

थुप्तेनको मोबाइलमा नेपाल र भारतका तस्करी एजेण्टहरुको नाम र नम्बर पत्ता लगाउने फरेन्सिक ल्याबमा पठाइएको बताइएको छ । थुप्पतेनको नेपालका केही विवादास्पद व्यवसायी, मेडिकल कलेज सञ्चालकहरुसँग उठबस रहेको पाइएको छ । पक्राउ पर्नु अगाडि नै उनीहरूले मोबाइलमा रहेका सबै सूचना डिलिट गरेकाले फरेन्सिक ल्याबमा पठाइएको हो ।  

राजश्व अनुसन्धानले २० दिन अनुसन्धान गरेको फाइल सीआईबीलाई बुझाएकाले यसको अनुसन्धानसँगै सुन तस्करीहरूको थप कनेक्सन खोज्ने काम सुरु भएको छ । अहिले यी दुई व्यक्तिको सम्बन्ध कुन तहसम्म छ भनेर सीआईबीले  अनुसन्धान केन्द्रित गरेको छ । भारतीय नागरिक थुप्तेन नेपालतर्फ सुन तस्करीको व्यवस्थापन मिलाउने व्यक्ति हुन् । उनले नै नेपालीको नाममा कम्पनी दर्ता गरी सवारीसाधनका पाटपुर्जा तथा अन्य सामानमा लुकाएर तस्करीको वातावरण बनाएको खुलेको छ ।  

सीआईबीले दावाको नेपालमा नेता तथा उच्च सुरक्षा अधिकारीसम्म चिनजान र सम्बन्ध रहेको देखिएको भन्दै उनको मोबाइलबाट यसका कनेक्सन पत्ता लगाउने तयारी गरिरहेको छ । नेपाली महिलासँग बिहे गरेर व्यवसायसमेत गर्दै आएका उनी पाँच वर्षदेखि नेपालमा बस्दै आएका छन् । दोहोरो नागरिकता र राहदानीको विषयमा अनुसन्धान भइरहेको बेला राजस्व अनुसन्धान विभागले काठमाडौँको ठमेलबाट उनलाई पक्राउ गरेको थियो । 

छिरिङको विगतको सम्पर्क सत्तारूढ माओवादी केन्द्र र प्रशासनिक व्यक्तिहरूसँग देखिएसँगै सीआईबीले अनुसन्धानको सुई राजनीतितिर ढल्काएको छ । स्रोतका अनुसार राजनीतिक र प्रशासनिक संरक्षणमा दावाले काभ्रेबाट वंशजका आधारमा नेपाली नागरिकता लिएका छन् । दावाले २०७४ पुस २० गते नेपाली नागरिकता लिएको र त्यसमा भने उनको नाम निमा तामाङ राखिएको स्रोतले जनाएको छ ।

दावाकी श्रीमती रोल्पा थवाङकी अमला रोका हुन् । दावाले सम्पर्क–सम्बन्ध अघि बढाएसँगै माओवादी नेताहरूसँग सम्बन्ध बढाएर अपराध कर्ममा संलग्न रहेको स्रोतको दाबी छ । २०७४ साल अघिसम्म माओवादी केन्द्रको रोल्पा–काठमाडौँ सम्पर्क मञ्चकी उपाध्यक्ष रहँदा रोल्पाको थवाङकी अमला रोका व्यापार गर्ने क्रममा दावासँग नजिकिएकी थिइन् । फाट्टफुट्ट जडीबुटी व्यापार गर्ने क्रममा ठमेलको व्यापारिक वृत्तमा अमलाको चिनजान दावासँग भएको थियो । अमलासँग निकटता बढेसँगै दावा माओवादी केन्द्रका नेताहरूको सम्पर्कमा पुगेको सीआईबीको दाबी छ ।

हुन्डीदेखि जडीबुटी, सुन तस्करीलगायत धेरै किसिमको अपराधमा उनको संलग्नता देखिएको छ । प्रहरीका उच्च हाकिमसँग पनि उनको सम्बन्ध पनि भेटिएको छ । नेपाल प्रहरीका एक पूर्व प्रहरी महानिरीक्षकले उनलाई ‘फोन नै रिसिभ भएन त भाई’ भन्दै ह्वाट्सएपमा म्यासेज पठाएको अनुसन्धानमा खुलेको छ । राम्रोसँग छिरिङ नेपालीसमेत बाेल्ने उनले उच्च प्रहरी अधिकारीलाई दाई भन्ने गरेका थिए । विगतमा कल बाइपासदेखि अवैध कल सेन्टरको धन्दामा पनि उनको सम्पर्क देखिए पनि प्रहरीले उनीमाथि कारबाही गर्न सकेको थिएन । जसकारण यो काण्डमा केही पूर्व प्रहरी अधिकारीमाथि समेत छानबिन हुने सम्भावना सीआईबीले देखाएको छ ।  

दावा र थुप्तेनको मोबाइल प्रहरीको डिजिटल फरेन्सिक ल्याबमा पठाइएको छ । पक्राउ पर्नुअघि नै उनीहरूले मोबाइलका धेरै डेटा डिलिट गरिसकेका थिए । रिकभर हुन सकेमा सुन तस्करीको उच्च तहको नेटवर्क पत्ता लाग्ने प्रहरी अधिकारीहरू बताउँछन् । उनीहरूले वी च्याटमार्फत कारोबारी बीच संवाद गर्दै आएका थिए । तस्करीमा संलग्न अन्य चिनियाँ गिरोहका सदस्यको नाम पत्ता लागे पनि उनीहरू भने फरार भइसकेका छन् । उनीहरूले काठमाडौंका चार ठाउँमा गोदाम राखेर सुन लुकाउने, गाल्ने र बाँडफाँट गर्दै आएको खुलेको छ ।