कारागारबाट फरारका क्रममा पक्राउ गरिएका २ कैदीबन्दीको शंकास्पद मृत्यु

२४ साउन, काठमाडौं । संखुवासभाकाे जिल्ला कारागार खाँदबारीमा दुईजना कैदीबन्दीको मृत्यु भएको छ । कारगारमा रहेका नुवाकोटको ककनी गाउँपालिका–७ का २८ वर्षीय आकाश बलामी र संखुवासभाको मादी नगरपालिका–५ का १९ वर्षीय विनोद तोलाङ्गीको आज बिहान कारागारभित्र मृत्यु भएको हो ।

बुधबार बिहान अचेत अवस्थामा फेला परेपछि उपचारका लागि जिल्ला अस्पताल पुर्याउँदा दुवै जनालाई चिकित्सकले मृत घोषणा गरेका थिए । उनीहरूलाई मंगलबार राति कारागारको शौचालय फोडेर भाग्ने क्रममा नियन्त्रणमा लिएर कारागारमा राखिएकाे थियो । तोलांगी बलात्कार र बलामी चोरी मुद्दामा कैद सजाय काटिरहेका थिए ।

दुवैको शव जिल्ला अस्पतालमा राखिएको प्रहरीले जनाएको छ । उनीहरुको मृत्यु शंकास्पद रहेको भन्दै आफन्तले शव बुझ्र नमानेको जनाइएको छ । घटनाको छानबिन गर्नेबारे जिल्ला सुरक्षा समितिको बैठकमा छलफल भइरहेको बताइएको छ ।