खराब कर्जाले हिमालयन बैंकको वित्तीय अवस्था खतराको मोडमा, वितरणयोग्य मुनाफा ऋणात्मक

२४ साउन, काठमाडौं । कुनै बेलाको अब्बल र आकर्षक बैंकको रुपमा चिनिएको हिमालयन बैंक पछिल्लो दिनमा नेपालका वाणिज्य बैंकहरुमध्ये सबैभन्दा कमजोर देखिन थालेको छ । वित्तीय हिसाबमा पुरानो बैंक दिन प्रतिदिन खराब हुँदै जान थालेको छ ।

बैंकको खराब कर्जा निकै बढेको छ । बैंकको खराब कर्जा ५ प्रतिशत नजिकै पुगेको छ । यसले गर्दा बैंक रेड जोनमा देखिन्छ । वाणिज्य बैंक मध्ये सर्वाधिक खराब कर्जा हुने बैंकको सूचीको दोस्रो नम्बरमा हिमालयन बैंक पर्छ ।

बैंकको हालै सार्वजनिक गरेको वित्तीय विवरणमा वितरणयोग्य मुनाफा यसपटक ऋणात्मक मोडमा पुगेको छ । बैंकको वितरणयोग्य मुनाफा हेरेर संस्थापक र सर्वसाधारण लगानीकर्ता निराश छन् । वित्तीय अवस्था बिग्रिएर नाजुक अवस्थामा पुगेको सिभिल बैंकसँग बिग मर्जमा गएको यस बैंकको वासलातको आकार ठूलो देखिएपनि वित्तीय प्रर्दशन भने झन् खराब देखिएको  छ ।

यसबाट सिभिल बैंकका लगानीकर्ता झनै निराश बनेका छन् । यद्यपि सिभिल बैंकले पछिल्लो समय राम्रो ग्रोथ गरिरहेको थियो । उसका पछिल्ला वित्तीय सूचकांकहरु सन्तोषजनक नै थिए तर हिमालयन बैंकसँग गाभिनु भन्दा एक्लै अघि बढेको भए बरु राम्रो हुने कुरा लगानीकर्ताले यतिबेला सोचिरहेका छन् । बैंक आफैले सार्वजनिक गरेको चौथो त्रैमासको वित्तीय विवरणका अनुसार बैंकको संचित मुनाफा ऋणात्मक छ । आब २०७९-८० को वासलातमा बैंकको संचित मुनाफा ७१ करोड १४ लाखले ऋणात्मक देखिएको छ ।

यस बैंकको संचालक समितिको अध्यक्षमा प्रचण्डबहादुर श्रेष्ठ रहेका छन् । बैंकको संचालक समितिका अन्य सदस्यमा फइसल एन ललानी, सुनिलबहादुर थापा, जितेन्द्र धिताल, आसिश शर्मा र विजयबहादुर श्रेष्ठ रहेका छन् । 

त्यस्तै बैंकको उच्च व्यवस्थापनमा सीईओ अशोक शमशेर जबरा बिगत दुई दशकदेखि कार्यरत रहेका छन् । सिभिल बैंक हिमालयन बैंकमा गाभिएको ५ महिना नपुग्दै सहायक प्रमुख कार्यकारी अधिकृत सचिनजंग रायमाझीले बैंक छाडेका छन् । रायमाझीले एक महिना अघिनै हिमालयन बैंकबाट राजीनामा दिएको बैंक बताइएको छ । 

सिभिल बैंकको डीसीईओ रहेका रायमाझी मात्र मर्जरको समयमा हिमालयन बैंकमा आबद्ध थिए । उनी तत्कालीन सिभिल बैंकबाट कर्मचारीको नेतृत्व गरेका थिए । गत बैंशाखमा तत्कालीन सिभिल बैंकको एजीएम रहेका सुमन आचार्यले पनि हिमालयन बैंक  छाडेर लुम्बिनी विकास बैंकको डीसीईओ बनेका छन् । 

सिभिल बैंकको तत्कालीन नेतृत्वमा रहेका सीईओ सुनिल पोखरेलले बैंक मर्ज हुनु अघि नै भिआरएस लिएका थिए । रायमाझीले अन्तर्राष्ट्रिय बैंकिङ्ग अनुभव लिन भन्दै हिमालयन बैंक छाडेको बताए पनि बैंकमा कर्मचारीलाई काम गर्ने वातावरण नरहेको बुझिएको छ । हिमालयन बैंकको उच्च व्यवस्थापनको गैर व्यवसायिक व्यवहारका कारण बैंकका धेरै कर्मचारीहरू बैंक छोड्ने मुडमा पुगेको बताइएको छ । 

कस्तो आयो आर्थिक वर्ष ०७९-८० को चौथो त्रैमासको वित्तीय प्रतिवेदनः
खुद मुनाफाः
गत आर्थिक वर्षको चौथो त्रैमास अर्थात् १२ महिनाको अवधिमा बैंकले ३ अर्ब २६ करोड बराबर खुद मुनाफा गरेकोमा अघिल्लो आर्थिक वर्षको चौथो त्रैमाससम्ममा बैंकले २ अर्ब ३६ करोड बराबर खुद मुनाफा गरेको थियो । यसरी खुद मुनाफामा ३७ दशमलव ९६ प्रतिशतको वृद्धि भएको छ ।

खुद ब्याज आम्दानी र संचालन मुनाफाः
अघिल्लो आर्थिक वर्षको चौथो त्रैमासमा कम्पनीले ४ अर्ब ९४ करोड बराबर खुद ब्याज आम्दानी गरेकोमा गत आर्थिक वर्षको चौथो त्रैमाससम्म कम्पनीले ९ अर्ब ९३ करोड खुद ब्याज आम्दानी गरेको छ । मर्ज पछि बैंकको पुँजीगत आकार ठूलो भएका कारण यसरी खुद ब्याज आम्दानीमा १०० दशमलव ९५ प्रतिशतको वृद्धि भएको हो । त्यस्तै, संचालन मुनाफा ११४ दशमलव ८१ प्रतिशतले वृद्धि हुँदै ५ अर्ब ४९ करोड पुगेको छ । अघिल्लो वर्षको चौथो त्रैमासमा कम्पनीले २ अर्ब ५५ करोड संचालन मुनाफा गरेको थियो ।

प्रतिशेयर आम्दानी:
कम्पनीको वार्षिक प्रतिशेयर आम्दानी १९ रूपैयाँ १९ पैसा हुन आउँछ । एक वर्ष अघि प्रतिशेयर आम्दानी १८ रूपैयाँ २६ पैसा थियो । समिक्षा अवधिमा प्रतिशेयर आम्दानी ५ दशमलव ०९ प्रतिशतले मात्र बढेको छ । पुँजीका हिसाबमा यो नगण्य मात्रा हो ।

वितरणयोग्य मुनाफा:
कम्पनीको वितरणयोग्य मुनाफा बिग मर्जपछि ७१ करोड १४ लाख ऋणात्मक रहेको छ । अघिल्लो आर्थिक वर्ष वितरणयोग्य मुनाफा २ अर्ब ५६ करोड थियो । समीक्षा अवधिमा वितरणयोग्य मुनाफा १२७ दशमलव ७१ प्रतिशतले घटेको छ । अघिल्लो आर्थिक वर्ष प्रतिशेयर वितरणयोग्य मुनाफा १९ रूपैयाँ ८० पैसा थियो ।

निक्षेप, कर्जाः
कम्पनीले गत आर्थिक वर्षको चौथो त्रैमाससम्म २ खर्ब ७५ अर्ब निक्षेप संकलन गरी २ खर्ब ३० अर्ब कर्जा प्रवाह गरेको छ । आर्थिक वर्ष २०७८-७९ को असार मसान्त र अहिलेको तथ्यांकलाई दाँजेर हेर्दा कम्पनीको निक्षेप संकलन ६३ दशमलव ४७ प्रतिशतले वृद्धि भएको छ भने कर्जा प्रवाह पनि ५६ दशमलव ४२ प्रतिशतले वृद्धि भएको छ ।

जगेडा कोष, संचित मुनाफाः
जगेडा कोष १३० दशमलव ३९ प्रतिशतले बढ्दै १४ अर्ब ९१ करोड पुगेको छ भने संचित मुनाफा १२७ दशमलव ७१ प्रतिशतले घटेर ७१ करोड १४ लाख रुपैयाँ ऋणात्मक छ ।

किताबी मूल्य:
कम्पनीको किताबी मूल्य (प्रतिशेयर नेट्वर्थ) १६५ रुपैयाँ ५८ पैसा आउँछ ।

निष्क्रिय कर्जा:
कम्पनीको खराब कर्जा ४ दशमलव ५७ प्रतिशत रहेको छ । अघिल्लो आर्थिक वर्षको चौथो त्रैमासमा खराब कर्जा १ दशमलव ५९ प्रतिशत थियो ।

आधार ब्याजदर, स्प्रेडदरः
बैंकको आधार ब्याजदर केही बढ्दै १० दशमलव ८६ प्रतिशत पुगेको छ । यसले बैंकबाट कर्जा लिनेहरूलाई महँगो ब्याजदर पर्न जान्छ । स्प्रेडदर ४ दशमलव ७९ प्रतिशत छ । अघिल्लो आर्थिक वर्ष सोही अवधिमा स्प्रेडदर ४ प्रतिशत थियो ।