संखुवासभा कारागारका २ कैदीबन्दीको मृत्यु कुटपिटबाट भएको खुलासा

२४ साउन, काठमाडौं । मंगलबार राति संखुवासभा कारागारमा भएको दुई जना कैदीबन्दीको मृत्यु अन्य कैदीबन्दीको कुटपिटबाट भएको खुलेको छ । घटनापछि बुधबार बिहान भएको जिल्ला सुरक्षा समितिको बैठकले मृत्यु शंकास्पद रहेको र छानबिन गर्ने निर्णय गरेको थियो । 

त्यसपछि कुटपिटमा संलग्नताको आरोपमा प्रहरीले ९ जना कैदीबन्दीलाई अनुसन्धानका लागि हिरातमा लिएको छ । मंगलबार राति कारागारको शौचालयको झ्याल फोडेर भाग्न खोजेका  बलात्कार मुद्दाका नुवाकोट ककनी गाउँपालिका–७ का आकाश बलामी र चोरी मुद्दामा संखुवासभाको मादी नगरपालिका–५ का १९ वर्षीय विनोद तालांगीलाई प्रहरीले पक्राउ गरी कारागार प्रशासनलाई बुझाएको र राति नै उनीहरु दुवै जना कारागारभित्र मृत फेला परेका थिए । 

अचेत अवस्थामा फेला परेको भन्दै प्रशासनले उनीहरुलाई बुधबार बिहान जिल्ला अस्पताल पुर्याए पनि चिकित्सकले मृत घोषणा गरेका थिए । त्यसपछि सुरक्षा समितिको बैठक बसेको थियो । 

प्रारम्भिक अनुसन्धानका क्रममा दुवै जनालाई अन्य केदीहरुले कुटपिट गरेर हत्या गरेको खुलेपछि कुटपिटमा संलग्नलाई हिरासतमा राखिएको हो । दुवै शव आफन्तले बुझन मानेका छैनन् । शवलाई जिल्ला अस्पतालमा राखिएको छ । 

यो पनि पढ्नुहोस