दुई वर्षभित्र मुलुकका सबै क्षेत्रमा राष्ट्रिय प्रसारणमार्फत बिजुली पुग्छ : कुलमान घिसिङ

२५ साउन, काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले आगामी २ वर्षभित्र मुलुकका सबै क्षेत्रमा बिजुली पुग्ने बताएका छन् ।  बिहीबार आयोजित पत्रकार सम्मेलन गरेर उनले यस्तो दाबी गरेका हुन् । 

उनले पछिल्लो २ वर्षमा बिजुली खपत उल्लेख्य मात्रामा बढेको बताए । २ वर्षअघि प्रतिव्यक्ति बिजुली खपत २३५ युनिट रहेकामा अहिले बढेर २८० पुगेको जानकारी पत्रकार सम्मेलनमा दिए । उनले मुलुकका सबै उद्योगलाई मागेजति बिजुली दिएको समेत बताए । 

यस्तो घिसिङले २ वर्ष पहिले ८९ प्रतिशत नागरिकले राष्ट्रिय प्रसारणमार्फत बिजुली प्रयोग गरेकामा अहिले ९५ प्रतिशत नागरिकले राष्ट्रिय प्रसारण लाइनबाट बिजुली प्रयोग गरिरहेको उनले बताए । 

उनले पत्रकार सम्मेलनमा बोलिरहँदा भने पटकपटक बत्ति गएको थियो । त्यसमा उनले सिष्टममा समस्या आउँदा बत्ती गएको बताए । कार्यक्रमका बेला बिजुली छिनमै जाने र आउने क्रम चलेको थियो । 

यस्तै, प्राधिकरणले गत आर्थिक वर्ष २०७९/२०८० मा १२ अर्ब ३३ करोड रूपैयाँ नाफा कमाएको जानकारी दिए । घिसिङका अनुसार अपरिस्कृत वित्तीय विवरण अनुसार प्राधिकरणको नाफा १२ अर्ब ३३ करोड पुगेको हाे । 

आर्थिक वर्ष ०७७/७८ मा प्राधिकरणको नाफा ६ अर्ब १० करोड रूपैयाँ रहेको थियो । पत्रकार सम्मेलनमा कार्यकारी निर्देशक घिसिङले प्रधिकरण ऐन २०४१ बमोजिम सर्वसाधारणमा शेयर जारी गर्ने फ्रक्रिया अघि बढाइएको पनि जानकारी दिए ।

उनले प्राधिकरणको नेतृत्व सम्हालिदेखि नै मुलुकमा चलिरहेको दैनिक १८ घण्टासम्म लोडसेडिङ अन्त्य भएको हो । त्यसैकारण उनलाई दोस्रो पटक प्राधिकरणमा ल्याइएको हो ।