गृहमन्त्री र अर्थमन्त्रीको राजीनामा मागेकै बहानामा पक्राउ गर्नु अनुचितः अर्जुननरसिंह केसी

२६ साउन, काठमाडौं । नेपाली कांग्रेसका प्रभावशाली नेता अर्जुननरसिंह केसीले नेपाल प्रहरीको केन्द्रीय अनुसन्धान ब्युरो (सीआईबी) ले बिहीबार कांग्रेसका सांसद सुनील शर्मा पक्राउ प्रकरण सुन तस्करीलाई बचाउने खेल भएको बताएका छन् । उनले सामाजिक सञ्जालमार्फत  पहिले नै अनुसन्धान सकिएको भनिएको विषयमा फेरी मुद्दा उठाउनुले शंका पैदा भएको बताएका छन् ।  

पछिल्लो समयमा सुन तस्करी प्रकरणमा कडा रुपमा प्रस्तुत हुँदै आएका सांसद शर्मालाई झन्डै ३० बर्ष अघिको नक्कली सर्टिफिकेट प्रकरणमा हाल पक्राउ गरेपछि सत्तारुढ कांग्रेसका नेताहरू नै सशंकित हुन पुगेका हुन् । कांग्रेस नेता केसीले सो पक्राउ प्रकरणलाई लिएर सुन तस्करहरूलाई प्रोत्साहन गरेको त होइन भन्ने आशंका व्यक्त गरेका छन । 

उनले भारतको बीडीबीकेएस कलेज बाट १९९६ मा आईएस्सी उत्तीर्ण गरेको प्रमाण–पत्र बारेको छानबिन  ‘अपरेशन क्वाक’ ले  ७ वर्ष अघि नै अनुसन्धान सुरु गर्यो  र छाड्यो, त्यही केस हाल आएर सीआईबी ‘फोक्सट्रोट चार्ली’ अपरेसनले माननीय सुनील शर्मालाई पक्राउ गरेको छ,’ केसीले सामाजिक सञ्जालमा भनेका छन, ‘संसदमा सुन तस्करी काण्ड विरुद्ध सशक्त आवाज उठाउँदै अर्थमन्त्री र गृहमन्त्रीको राजीनामा मागकै कारण यो प्रकरण  पुनः युद्ध स्तरमा ताते को हो ? या संयोग मात्र हो ? यो गम्भीर र आम चासोको विषय बनेको छ ।’