रबि लामिछाने अमेरिकी एजेन्ट भएको नेकपाको गम्भीर आरोप

२६ साउन, काठमाडौं । नेत्रविक्रम चन्द ‘विप्लव’ नेतृत्वको  नेपाल कम्युनिष्ट पार्टी (नेकपा)ले संसदको चौथो शक्ति राष्ट्रिय स्वतन्त्र पार्टी (रास्वपा) का सभापति एवं पार्टीको संसदीय दलका नेता रवि लामिछाने अमेरिकी एजेन्ट भएको गम्भीर आरोप लगाएको छ । उसले लामिछाने नेपाली जनताको प्रतिनिधि नभई नेपालमा राजनीतिक अस्थिरता ल्याउन अमेरिकाले खडा गरेको एजेन्ट भएको बताएको छ । 

उपत्यका ब्यूरोद्वारा काठमाडौंमा आयोजित ध्रुवीकरण (पार्टी प्रवेश) कार्यक्रममा नेकपाका पोलिटब्युरो सदस्य चरिन पुन ‘मिलन’ले लामिछाने नेपाली जनताको प्रतिनिधि नभएको ठोकुवा गरे । उनले अमेरिकी साम्राज्यवाद नेपालभित्र विभिन्न रुपबाट प्रवेश गर्न खोजिरहेको र त्यसमध्ये रास्वपा पार्टी भएको बताए । उनले भने, ‘अमेरिकाले नेपालभित्र आफ्नो साम्राज्य बलियो बनाएर प्रभुत्व जमाउन रवि लामिछाने जस्ता पात्रलाई अगाडि सारेको छ । देशभित्र थुप्रै एजेन्टहरु जबर्जस्त खडा भएका पनि छन् । यस विरुद्ध लड्न नेकपा र माेर्चा तयार रहेको छ ।’

नेता मिलनले विश्वयुद्ध कम्युनिष्टका कारण नभई साम्राज्यवादी कारण भएको बताउँदै अहिले साम्राज्यवाद–साम्राज्यवाबीचको अन्तरविरोधका कारण विश्वमा युद्ध चलिरहेको बताए । अहिले नेपाल समाजवादको दिशातिर अगाडि बढिरहेको बेला त्यसलाई रोक्न अमेरिकाले रविहरु जस्ता पात्रहरूलाई योजनावद्ध रुपमा खडा गरेर राजनीतिक अस्थिरता पैदा गराइरहेको बताए । 

विदेशीको यही चाल बुझेर समाजवादी मोर्चा गठन भएको उनले बताए । अमेरिकी एजेन्टलाई ठेगान लगाउने काम मोर्चाले मात्र गर्न सक्ने उनको भनाइ थियो । विकासका नाममा अमेरिकाले एमसीसी र एसपीपी लगायतका योजना नेपालभित्र लागू गराउन खोजेको बताए । यसलाई रोक्न मोर्चाले सशक्त रुपमा अग्रपंक्तिमा रहेर प्रतिकार गर्ने बताए ।  मोर्चामा देशभक्त, राष्ट्रवादी र कम्युनिष्ट शक्ति गोलबन्द हुनुपर्नेमा उनले जोड दिए ।

नेता लामिछाने नेपाल छाडेर अमेरिकी नागरिक भएर लामो समय अमेरिका बसेर पछिल्लो सयममा अमेरिकी नागरिकता त्यागेर नेपाल आएका व्यक्ति हुन् । नेपालभित्र टेलिभिजनमा कार्यक्रम प्रस्तोता रहेका उनले आफ्नो नेतृत्वमा गत असारमा रास्वपा गठन गरेका थिए । पार्टी सभापति भएकै बेला नेपाल र अमेरिकाको दोहोरो नागरिकता कसुरमा तानिएपछि सभापति पद र गृहमन्त्री पद समेत गुम्न पुगेको थियो । पछि सर्वोच्च अदालतको आदेशमा नेपाली नागरिकता पुन ः प्राप्त गरेका थिए । 

नागरिकता मुद्दाका बेला एमालेका अध्यक्ष केपी शर्मा ओलीले समेत रास्वपाको चुनाव चिन्ह घण्टी अमेरिकाका राजनीतिक दलको चिन्हसँग मिलेको भन्दै आलोचना गरेका थिए । गत मंसिर ४ मा भएको आम चुनावबाट २० र बैशाख १० मा भएको उपचुनावबाट १ गरी रास्वपाले प्रतिनिधिसभामा महत्वपूर्ण स्थान हासिल गरेको छ । रास्वपासँग अहिले २१ सांसद छन् ।

यो पनि पढ्नुहोस