बर्दियामा भारी वर्षा हुँदा बाढीको जोखिम उच्च, सम्म परेका ठाउँहरू जलमग्न

२८ साउन, बर्दिया । निरन्तरको भारी बर्षाले बर्दियामा बाढीको जोखिम उच्च रहेको छ । बर्दियाका केही स्थानमा अति भारी वर्षा भएको जल तथा मौसम विज्ञान विभागले जनाएकाे छ ।

विभागमा अनुसार बर्दियाका विभिन्न ठाउँमा अति भारी वर्षा छ । विभागले जारी गरेकाे बुलेटिन अनुसार बर्दियाको रम्भापुरमा २४ घण्टामा २२६।४ मिलिमिटर वर्षा रेकर्ड गरेको छ । 

यस्तै बर्दियाकै रानी जरुवा नर्सरीमा १७२।८ मिमिमिटर वर्षा मापन भएको छ भने सानो श्री चेपाङमा १७४।२ मिलिमिटर वर्षा भएको छ । यी दुई ठाउँको वर्षा पनि अति भारी वर्षा जनिक छ ।

२४ घण्टामा १४० मिलिमिटर पानी पर्नु नै खतरा मानिन्छ । ५० देखि १०० मिलिमिटरभन्दा कम पानी पर्नुलाई ‘भारी वर्षा’, १०० भन्दा बढी तर २०० मिलिमिटरभन्दा कम पानी पर्नुलाई ‘धेरै भारी वर्षा’ र २०० मिलिलिटरभन्दा धेरै पानी पर्नुलाई ‘अति भारी वर्षा’ भएको मानिन्छ । बर्दीयाको रम्भापुरमा २४ घण्टामा २०० मिलिमिटरभन्दा धेरै वर्षा भएको छ ।

अति भारी वर्षा भएकाले बर्दियामा बाढीको उच्च जोखिममा परेको छ । भारी वर्षाले जिल्लाका सडक र सम्म परेका ठाउँहरू जलमग्न भइसकेका छन् । स्थानीय खोलामा आएको बाढीले बारबर्दिया नगरपालिका-८ का सबै गाउँहरू डुबानमा परेका छन् ।

बर्दियामा कर्णाली, बबइलगायत स्थानीय साना खोलाहरू रहेका छन् । तीन नदी र खोलामा आकस्मिक बाढी आउने भएकोले आसपासका बस्तीलाई सतर्क रहन सरोकारवालाले सूचना जारी गरेका छन् ।

यसैबीच, भारी वर्षा भैरहेकोले नदि तथा खोलामा पानीको बहाव बढेर ठाकुरबाबा नगरपालिकाका गाउँबस्तीमा जुन सुकै बेला पनि पस्न सक्ने भएकाले कुनै समस्या  उद्दारका लागि तत्काल जानकारी दिन ठाकुरबाबा नगरपालिकाले अनुरोध गरेको छ ।