वाणिज्य बैंकहरुको पहिलो नम्बरमा ग्लोबल आइएमई, पाँच अर्ब ४३ करोड रुपैयाँ कर भुक्तानी

२८ साउन, काठमाडौं । ग्लोबल आइएमई बैंक सबैभन्दा धेरै कर दाखिला गर्ने वाणिज्य बैंकहरुको सूचीको पहिलो नम्बरमा परेको छ ।  आर्थिक वर्ष २०७९/८० को असार मसान्तसम्म दाखिला भएको करको आधारमा ग्लोबल आइएमई बैंक पहिलो नम्बरमा परेको हो ।

अर्थ मन्त्रालय स्रोतका अनुसार ग्लोबल आइएमई बैंकले गत आवमा पाँच अर्ब ४३ करोड रूपैयाँ कर दाखिला गरेको छ । यो कर बैंकले बर्षभरी विभिन्न शीर्षकमा तिरेको सबै करको योग हो । ग्लोबल आइएमई बैंकले गएको आवमा सात अर्ब २५ करोड रूपैयाँ खुद मुनाफा गरेको छ ।

यो मुनाफा अघिल्लो वर्षको तुलनामा ४६.२६ प्रतिशतले बढी हो । ​​​​​​बैंकले अघिल्लो आव २०७८/७९ मा तीन अर्ब १७ करोड रूपैयाँ कर दाखिला गरेको थियो । २१ वटा बैक तथा वित्तीय संस्थाहरु मिलेर बनेको ग्लोबल आइएमई बैंक चुक्ता पूँजीको आधारमा मुलुककै सबैभन्दा ठूलो बैंक हो ।

नेपाल उद्योग वाणिज्य महासङ्घका अध्यक्ष चन्द्रप्रसाद ढकाल बैंकको सञ्चालक समितिको अध्यक्ष छन् भने बैंकको सीईओमा रत्नराज बज्रचार्य छन् ।