काठमाडौंमा बंगलादेशी कामदारलाई ‘बन्धक’ बनाउने नेपालीसहित ७ जना पक्राउ

२८ साउन, काठमाडौं । मलेसिया, पोल्यान्ड र क्रोएसियासहितका देशमा पठाउने भन्दै बंगलादेशी नागरिकहरुलाई बन्धक बनाएको आरोपमा सीआईबीले २ नेपालीसहित ७ जनालाई पक्राउ गरेको छ । पक्राउ पर्नेमा ५ जना बंगलादेशी छन् । 

पक्राउ परेका उनीहरुलाई सीआईबीले आइतबार सार्वजनिक गरेको छ । आरोपीहरुले पीडितहरुबाट लाखौं रुपैयाँ फिरौती समेत लिएको खुलेको सीआईबीले आइतबार आयोजित पत्रकार सम्मेलनमा जनाएको छ । 

उनीहरुले धेरै पैसा कमाई हुने प्रलोभनमा पार्दै गत असार २८ गते बंगलादेशी नागरिक राजोन, फर्हाद हुसेनलाई काठमाडौंमा ल्याइपुर्याएर बन्धक बनाएको पाइएको छ । उनीहरुलाई काठमाडौंका विभिन्न स्थानका होटलहरुबाट पक्राउ गरिएको हो । आरोपीमध्ये ३ जना महिला छन् ।

पक्राउ पर्ने नेपालीहरुमा इलामको चुलाचुली गाउँपालिका–७ घर भई काठमाडौंको नक्साल भगवतीबहाल बस्ने ३३ वर्षीया रोशीन राई र सिन्धुपाल्चोकको बलेफी गाउँपालिका–६ घर भई ललितपुरको हरिसिद्धि बस्ने २७ वर्षीया तारा नेपाली रहेकी छन् ।

अन्यमा बंगलादेशका जहाङ्गिर आलम, ताहमिना बेगम, अमिर हुसेन, मोहम्मद मोसिह्युर र सलिम मियाँ रहमान रहेका छन् ।