माओवादी बैठकमा महरालाई जेल जान तयार हुनुस् भनेपछि.......

२८ साउन, काठमाडौं । चिनियाँ नागरिक दावजिन वाङ मार्फत इलेक्ट्रिक सिगरेट (भेप)मा आएको सुन काण्डमा माओवादी उपाध्यक्ष कृष्णबहादुर महरा जोडिएपछि प्रचण्डले को को जोडिएको हो जेल जान तयार हुनुस् भनेका छन् । भेप मार्फत नेपालमा नौ किलो सुन ल्याएको प्रकरणमा नाम जोडिएका सत्तारुढ माओवादी केन्द्रका उपाध्यक्ष महराको नाम आएपछि प्रचण्डले बैठकमा यस्तो भनेको स्रोतले जनाएको छ । प्रचण्डको यस्तो भनाई आएपछि नेपाल प्रहरीको केन्द्रीय अनुसन्धान ब्यूरो (सीआईबी) समक्ष बयान दिन जाने बताइएकाे छ ।

पदाधिकारी बैठकमा जेल जाने कुरा उठेपछि प्रधानमन्त्री तथा पार्टी अध्यक्ष प्रचण्ड र गृहमन्त्री नारायणकाजी श्रेष्ठलाई बयान दिन जाने बताएर महरा लुम्बिनी हुँदै दाङ पुगेका छन् । आइतबार दिउँसो प्रधानमन्त्री निवास बालुवाटारमा बसेको माओवादी मन्त्री र पदाधिकारीहरूको बैठकमा महराको विषय उठेपछि गृहमन्त्री श्रेष्ठले महरा ‘आवश्यक परे सीआईबीमै पुगेर बयान दिन तयार रहेको’ बताएका थिए ।  

बैठकमा महरा सहभागी थिएनन् । बैठकमा प्रधानमन्त्री दाहालले सरकार सुन तस्करी लगायतका संगठीत अपराध छानविनमा प्रतिबद्ध रहेको बताउँदै माओवादी नेताहरूको संलग्नता रहेको अवस्थामा उनीहरू आफैंले यसबारे प्रष्ट पार्नु पर्ने बताएका थिए । ‘हाम्रो पार्टीका जो जो नेताको नाम जोडिएको छ, आफैंले आफ्नो संलग्नताबारे प्रष्ट पार्नु हेला, नभए जेल जान तयार हुनुहोला’, प्रधानमन्त्री प्रचण्डको भनाई उद्यत गर्दै स्रोतले भन्यो ।  प्रधानमन्त्री समेत रहेका माओवादी अध्यक्ष प्रचण्डले नै पछिल्ला प्रकरणमा पार्टीका नेताहरूको नाम जोडिएको भन्दै अनुसन्धान अघि बढाउन गृहमन्त्रीलाई अन्य नेताहरूकै अगाडि निर्देशन दिएका थिए । श्रेष्ठले पनि साथीहरू भएपनि यस्तो अवस्थामा काम गर्न कठिनाइ भएको र सुरक्षा निकायले काम गर्न चाहेको खण्डमा साथीहरूले सहयोग गर्नुहोला भन्दै पन्छिएका थिए ।

आफ्नै नेताहरूको कारण सरकार र गठबन्धन धरापमा परेको जनाउँदै प्रचण्डले कांग्रेसले अब त्यसै नछाड्ने भएकाले सरकारबाट फिर्ता हुनसक्ने संभावना पनि रहेको बताएका थिए । ‘सरकारमा कांग्रेस पनि सहभागी भएको छ ख्याल गर्नुहोला, भ्रष्टाचारको फाइल खोल्दा को को पर्छन कसैले ख्याल गरेको छैन, सरकारी कागजातले को को समाउनु पर्ने हुन्छ ध्यान दिनु होला’, प्रचण्डको भनाई उद्धृत गर्दै माओवादीका एक पदाधिकारीले भने ।