बामपन्थी नेता मणि थापालाई पार्टीबाट बिदा गर्दै एमाले

३० साउन, काठमाडौं । नेकपा एमालेले पार्टीका स्थायी कमिटी सदस्य मणि थापालाई निस्कासन गर्ने भएको छ । उनी लामो समयदेखि पार्टीको सम्पर्कमा नरहेको र निष्क्रिय समेत भएकाे विषयमा उनीसँग सोधपुछ गर्ने र चित्त बुझ्दो जवाफ नआए पार्टीबाट विदाई गर्ने भएको छ ।

सचिवालय बैठकले एमालेबाट विदा गर्नुभन्दा पहिलो थापासँग एक पटक सोधपुछ गर्ने निर्णय भएको एक एमाले नेताले नेपालबहसलाई बताए । पार्टीबाट हटाउने कि उनी आफै निस्कने भन्ने कुराको टुंगो गर्न महासचिव शंकर पोखरेललाई थापासँग सोधपुछ गर्ने भनिएको छ । पार्टीका अरू नेताहरूलाई फरक भूगोलको जिम्मा दिँदा उनी बिदामा बसेका थिए ।

पार्टी काममा नआउने र  निष्क्रिय रहनेहरूलाई बिदा गर्ने रणनीति अनुरूप थपालाई अन्तिम पटक सोध्न लागिएको हो । उनले एमालेमै रहेर नेकपा एमाले दक्षिणपन्थी पार्टी भएकाले काम नलाग्ने बताउँदै आएका छन् । एमालेजस्तै नेकपा माओवादी लगायतका कुनै पनि पार्टी काम नलाग्ने भएकाले विद्रोह गरेर नयाँ वामपन्थी पार्टी बनाउनुपर्ने भनाइ थापाले राख्दै आएका छन् । 

अहिले नेपालमा भएका सबै दक्षिणपन्थी कम्युनिस्ट हुन् । अहिले म एमालेमा छु, यो दक्षिणपन्थी कम्युनिस्ट हो’ काभ्रेको पनौतीमा आयोजित एक अन्तरक्रियामा उनले भनेका थिए । त्यस यता उनी एमालेमा निष्क्रिय रहँदै आएका छन् । 
 
माओवादीबाट विद्रोह गरेर रामबहादुर थापा बादलसँगै एमाले प्रवेश गरेका मणिले अब नयाँ वाम पार्टीको आवश्यकता रहेको बताउँदै आएका छन् । एमाले अध्यक्ष केपी शर्मा ओलीको पनि उनले विरोध गर्दै आएका छन् । एमाले भएको नाताले केपीले जे भने पनि विरोध गर्न मिल्दैन भन्दै उनले पार्टीभित्र नै विरोध गर्दै आएका थिए । यसैले थापालाई पार्टीबाट विदा गर्ने तयारीमा एमाले पुगेको हो ।