सांसद शर्माको सर्टिफिकेट छानबिनको माग गर्दै विद्यार्थीले गरे प्रदर्शन

३० साउन, काठमाडौं । नेपाली कांग्रेसका सांसद सुनिलकुमार शर्माको शैक्षिक प्रमाणपत्र छानबिन गर्न माग गर्दै अखिल क्रान्तिकारीले मंगलबार काठमाडाैंकाे माइतीघर मण्डलामा प्रदर्शन गरेको छ । 

शर्माको शैक्षिक प्रमाणपत्र नक्कली रहेको उजुरीका आधारमा अनुसन्धान गर्न सीआईबीले शर्मालाई गएको बिहीबार मात्र पक्राउ गरेको थियो । तर काठमाडौं जिल्ला अदालतले तत्काल प्रमाण, सबुद नष्ट गर्न सक्ने अवस्था नदेखिएको भन्दै थुनाबाहिर राखेर अनुसन्धान गर्न भनेपछि तारेखमा रिहा भएका छन् । 

उनीमाथि अनुसन्धान भने सीआईबीले गरिरहेको छ  । प्रदर्शन माओवादी केन्द्रनिकट अखिल क्रान्तिकारीले गरेको हो । रिहा भएपछि भने शर्माले आफूलाई राजनीतिक प्रतिशोधमा पक्राउ गरेको भन्दै गृहमन्त्री नारायणकाजी श्रेष्ठको राजीनामाको माग गर्दै आएका छन् । 

शर्माले भारतको बिहारका कलेजमा अध्ययन गरेको भनिएको प्रवीणता प्रमाणपत्र तहको सर्टिफिकेट नक्कली भएको नेपाल मेडिकल काउन्सिलको दाबी छ । काउन्सिलकै पत्रका आधारमा शर्मा पक्राउ परेका थिए ।

कानुन बनाउने थलोमा पुगेका सांसद नै कीर्ते प्रमाणपत्र धारी भएको भन्दै कारवाहीको दायरामा ल्याउनुपर्ने प्रदर्शनकरीहरुको भनाइ छ ।