प्रधानमन्त्री प्रचण्डले गरे आईजी र विमानस्थल सुरक्षा प्रमुखसँग छलफल

३१ साउन, काठमाडौं । प्रधानमन्त्री पुष्पकमल दाहाल ‘प्रचण्ड’ले प्रहरी महानिरीक्षक (आईजी) वसन्तबहादुर कुँवर र विमानस्थल सुरक्षा प्रमुख डीआईजी अर्जुन चन्द ठकुरीलाई बुधबार दिउँसो सिंहदरबारमा बोलाएर छलफल गरेका छन् । 

तीन जनाबीचको छलफल सकेपछि सुरक्षा, भन्सारसँग सम्बन्धित मन्त्री, मन्त्रालयका सचिव, विभागका प्तारमुख, सुरक्षा निकायका प्रमुख लगायतकाे बैठक बसिरहेकाे छ । 

गत साउन २ गते हङकङ हुँदै त्रिभुवन अन्तर्राष्ट्रिय विमानस्थलबाट मोटरसाइकलको ब्रेकशुमार्फत भन्सार छलेर भित्रिएको तस्करीको क्विन्टल सुन भन्सार विभागले सिनामंगलबाट नियन्त्रणमा लिएको थियो । उक्त सुन मंगलबार मात्र पगालेर जोख्दा ६० केजी ७१६ ग्राम ठहरिएको थियो । सुन तस्करीबारे प्रधानमन्त्रीको निर्देशनपछि भन्सारको पत्रका आधारमा प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिरहेको छ । प्रकरणमा हालसम्म २१ जना पक्राउ परेका छन् । जसमध्ये ९ जना चिनियाँ नागरिक छन् ।

सुन लगायत अवैध रुपमा भित्रिने सामान चेकजाँच गर्न एक्सरे मेशिन राखेको अवस्थाबीच पनि अवैध रुपमा क्विन्टल मात्रामा सुन तस्करी भएपछि प्रधानमन्त्रीले सुरक्षाबारे गम्भीर चासो देखाएका छन् । क्विन्टलभन्दा अगाडि विद्युतीय चुरोट (भेप)का लुकाएर तस्करी भएको भनिएको ९ किलो सुन प्रकरणमा प्रचण्डको आफ्नै पार्टीका उपाध्यक्ष कृष्णबहादुर महरा र उनका छोरा राहुलको नाम मुछिएपछि अनुसन्धानको विषय नै पेचिलो बन्दै गएको अवस्था छ । 

प्रधानमन्त्री प्रचण्डले सुन तस्करीमा महराको बाबु–छोराको नाम मुछिएको भन्दै अनुसन्धान अघि बढाउने बताउँदै आएका छन् । प्रकरणमा विभिन्न व्यक्ति पक्राउ परेपनि महराका बाबु–छोरामाथि अनुसन्धान हुन नसक्दा प्रधानमन्त्रीको समेत आलोचना भइरहेको छ ।

सुरक्षा जाँचमा तस्करीको सेटिङ भएको भन्दै एमालेका सांसदहरुले गृहमन्त्री नारायणकाजी श्रेष्ठ र अर्थमन्त्री डा. प्रकाश शरण महतको राजीनामा समेत माग गर्दै आइरहेको छ ।