आज पक्राउ परेका चार चिनियाँसहित २२ जनालाई थप पाँच दिन हिरासतमा राखेर अनुसन्धान गर्न अनुमति

३१ साउन, काठमाडौं । जिल्ला अदालत काठमाडौंले बुधबार पक्राउ परेका चार जना चिनियाँ नागरिकसहित २२ जनालाई ५ दिन हिरासतमा राखेर अनुसन्धान गर्न अनुमति दिएको छ । उनीहरूलाई म्याद थपका लागि काठमाडौं जिल्ला अदालतमा उपस्थित गराइएको हो । 

यसअघि पक्राउ गरेका १७ जनालाई पनि त्यति नै समय हिरासतमा राख्न अदालतले अनुमति दिएको छ । उक्त सुन प्रकरणमा राजस्व अनुसन्धान विभागले १७ जनालाई पक्राउ गरेर सीआईबीलाई बुझाएको थियो । साउन ३ गते बरामद भएको ६० केजी ७१६ ग्राम सुन बरामद प्रकरणमा प्रहरीले थप ३ पुरुष र एक महिला गरी ४ जना चिनियाँ नागरिकलाई आज पक्राउ गरेको हो ।

पक्राउ पर्नेमा टीयान मी, वेन तोङ, डीङ सेग्फा र ली–नेङकाई रहेकाे केन्द्रीय प्रहरी प्रवक्ता डीआइजी कुवेर कडायतले बताए ।

नेपाल प्रहरीका केन्द्रीय प्रवक्ता डीआईजी कुवेर कडायतले ती चिनियाँ नागरिकलाई केन्द्रीय अनुसन्धान ब्यूरो (सीआईबी) को टोलीले काठमाडौंबाट पक्राउ गरेको बताए ।

यसअघि मंलगरबार पक्राउ परेका तीन जना चिनियाँ नागरिकलाई भने प्रहरीले नगद रूपैयाँसमेत बरामद गरेको कारण थप अनुसन्धानका लागि राजस्व विभागलाई बुझाएको छ ।