‘हत्या’ गरिएका आरती साहका परिवारको मागबारे आयोगले देखायो चासो

३० साउन, काठमाडौं । राष्ट्रिय मानव अधिकार आयोगले ‘हत्या’ गरिएका धनुषाकी आरती साहका परिवारका सदस्य र वैवाहिक ‘बलात्कार’की पीडित आरती रावलको मागबारे गम्भीर चासो देखाएको छ । 

आयोगले बुधबार एक विज्ञप्ति जारी गर्दै निरन्तर अनशनका कारण उनीहरुको स्वास्थ्यमा पर्न सक्ने जोखिमप्रति संवेदनशील हुँदै संवादको माध्यमबाट समस्या गर्न र माग सम्बोधन गरी अनसनरत व्यक्तिको मानव अधिकारको रक्षा गर्न आग्रह गरेको हो ।

आरतीको आत्महत्या नभई दाइजो नल्याएका कारण परिवार मिलेर हत्या गरेको भन्दै उनकी आमा, बाबु र बहिनी महिनौदेखि काठमाडौंको माइतीघर मण्डलामा अनसन बसिरहेका छन् । हत्याबारे माइती पक्षले दिएको जाहेरी समेत प्रहरीले दर्ता र दोषीलाई पक्राउ गर्न प्रहरीले नमानेको भन्दै पक्राउका लागि अनसन बसेका हुन् ।

आरतीलाइ माइतीबाट दाइजाे नल्याएकाे निहुँमा देवर, सासु लगायत मिलेर हत्या गरी आत्महत्या गरेकाे देखाउन झुण्ड्याइएकाे माइती पक्षकाे दाबी छ ।

धर्नामा बसिरहेका व्यक्तिहरुको स्वास्थ्यमा गम्भीर असर पर्दै गइरहेको समेत आयोगले सरकारको ध्यानाकर्षण गराएको छ । ‘वर्षातको समयमा निरन्तर अनशनमा बसेका कारण अनशनरत व्यक्तिहरूको स्वास्थ्य र दैनिक खानपानमा समेत समस्या भएको अनुगमनको क्रममा पाइएको छ’ आयोगका प्रवक्ता टीकाराम पोखरेलद्वारा जारी विज्ञप्तिमा भनिएको छ । 

यस्तै, त्यस्तै वैवाहिक ‘बलात्कार’का पीडित आरती रावलको मागबारे आयाेगले सरकारकाे ध्यानाकर्षण गराएकाे छ । उनले आफूमाथि वैवाहिक ‘बलात्कार’ भएकाे भन्दै दाेषीमाथि कारबाहीको माग गर्दै माइतीघर मण्डलामा अनशनमा बसिरहेकी छन् ।