पार्टीका कुनै पनि तहले गर्ने कार्यक्रममा अध्यक्ष ओलीबाहेक कसैको पनि फोटो राख्न नपाइने एमालेको सर्कुलर

३२ साउन, काठमाडौं । नेकपा एमालेले अबदेखि पार्टीका कुनै पनि कार्यक्रममा अध्यक्ष केपी शर्मा ओलीबाहेक कसैको पनि फोटो राख्न नपाइने सर्कुलर जारी गरेको छ । सार्वजनिक कार्यक्रम, मञ्चमा पार्टी अध्यक्ष केपी शर्मा ओलीको मात्र फोटो राख्न पार्टीका सबै निकायलाई परिपत्र गरेको छ । सोमबार बसेको पार्टी सचिवालयले गरेको निर्णय सार्वजनिक गर्दै एमाले उपमहासचिव विष्णु रिमालले सार्वजनिक कार्यक्रममा अध्यक्षको मात्र फोटो राख्न पाइने नियम बनाइएको बताएका छन् । 

उनले सामाजिक सञ्जालमार्फत एमालेको केन्द्रीय उद्योग तथा वाणिज्य विभागले आयोजना गरेको कार्यक्रममा अध्यक्ष केपी शर्मा ओलीले केन्द्रीय सचिवालयको हालैको सार्वजनिक कार्यक्रम व्यवस्थापनसम्बन्धी निर्णय सार्वजनिक गरेको बताएका छन् । ओलीको यो निर्णयको सबैले स्वागत गरेको उल्लेख गरेका छन् । एमालेका कार्यक्रममा भद्दा आसन ग्रहण निषेध, फूलमाला र खादा निरूत्साहित गर्न यस्तो निर्णय गरिएको हो । 

कार्यक्रमको गरिमा र मर्यादालाई बढाउन पार्टी र जनसंगठनहरुले आयोजना गर्ने सार्वजनिक कार्यक्रममा पार्टी अध्यक्ष बाहेक अन्य फोटो प्रयोग नगर्ने निर्णय गरिएको उनले बताएका छन् । त्यस्तै मञ्चको प्रयोग वक्ताले मात्र गर्ने, अतिथि र वक्ताहरूलाई दर्शकदीर्घामा नै मर्यादित ढङ्गले आसनको व्यवस्था मिलाउने निर्णय पनि भएको उनको भनाई छ । 

उपमहासचिव रिमालले कार्यक्रममा तथा कार्यक्रम सुरू भएपछि आसन ग्रहणको उद्घोषण गरिरहने परम्परा अन्त्य गर्ने, कार्यक्रममा ब्याज, माला र खादाको अनावश्यक प्रयोग नगर्ने र कार्यक्रमलाई भड्किलो नबनाउने निर्णय भएको पनि उल्लेख गरेका छन् । पार्टी अध्यक्ष ओलीले सामाजिक सञ्जालमा आएका सुझावलाई ध्यानमा राखेर मञ्च सञ्चालनसम्बन्धी नयाँ परिपाटीको थालनी गर्न यस्तो निर्णय गरेको रिमालको भनाइ छ ।