नक्कली शैक्षिक प्रमाणपत्र पेस गरेको आरोपमा चितवन मेडिकल कलेजबाट १ विद्यार्थी पक्राउ

१ भदौ, काठमाडौं । नक्कली शैक्षिक प्रमाणपत्र बनाएर एमबीबीएस अध्ययन गरिरहेको आरोपमा नेपाल प्रहरीको केन्द्रीय ब्यूरो (सीआईबी)को टोलीले चितवनबाट एक विद्यार्थीलाई पक्राउ गरेको छ । 

पक्राउ पर्नेमा नसिम अख्तर रहेको जनाइएको छ । सप्तरीको राजविराज नगरपालिका–७ घर भई हाल चितवन मेडिलकल कलेज (सीएमसी)मा एमबीबीएसमा अन्तिम सेमेष्टरमा अध्ययनरत उनलाई गएराति चिवतवनको भरतपुरबाट पक्राउ गरिएको हो । सीआईबीले नक्कली प्रमाणपत्र पेस गरेर एमबीबीएस अध्ययन गरिरहेको भन्ने सूचनामा आधारमा अनुसन्धानका लागि उनलाई पक्राउ गरी सीआईबीलाई जिम्मा लगाइएको चितवन प्रहरीले जनाएको छ । 

उनले सीएमसीमा काठमाडौंका एक निजी कलेजबाट आईएस्सी उत्तीर्ण गरेको प्रमाणपत्र बुझाएको पाइएको छ । यसअघि एमबीबीएस अध्ययनका लागि भारतबाट नक्कली शैक्षिक प्रमाण ल्याएर पेस गरेको आरोपमा कांग्रेस सांसद गत हप्ता बिहीबार पक्राउ परेका थिए । उनलाई जिल्ला अदालतको आदेशमा तारेखमा राखेर अनुसन्धान गरिरहेको छ ।