जनै पूर्णिमाको गन्तव्य पाँच पोखरी [ फोटोफिचर ]

३ भदौ, काठमाडौं । पाँच पोखरी, प्राकृतिक छटाहरु भरिपूर्ण पैदल गन्तव्य हो । सिन्धुपाल्चोक जिल्लाको पाँचपोखरी थाङपाल गाँउपालिकामा अवस्थित पाँचपोखरीको आफ्नो सांस्कृतिक र धार्मिक मान्यता पनि रहेको छ । राजधानी काठमाडौँबाट करिब दुई दिनको यात्रा पछि पुग्न सकिने सो पोखरी ।

सार्वजनिक यातायातबाट जाने हो भने काठमाडौंको जोरपाटीबाट पाँच पोखरीको लागि बस बिहानको ६ः३० बजे छुट्ने गर्दछ । सो बसले दिउँसोको १२, १ बजे पुराउँछ, छिन्ती बजार, जुन बस यात्राकाे अन्तिम गन्तव्य हो । छिन्तीमा खाना खाईवारी सुरु हुन्छ पैदल यात्रा । बाटो केही अप्ठ्यारो भएतापनि हरियाली, खोला, झरना र ग्रामीण जनजीवन हेर्दै यात्रा गर्दा बाटो कटेको भने पत्तै हुँदैन । छिम्तीबाटको पैदल यात्रापछि उकालो हुँदै टुप्पी डाँडा टप खर्केमा भने बास बस्नुपर्ने हुन्छ ।

टपखर्क नोरसिन्गपाटी लौरिबिनाको यात्रा पछि भने पाँचपोखरी पुग्न सकिन्छ । एकै ठाउँमा पाँच वटा पोखरी, सेता हिमाल, चिसो हावापानी र जमिनभरी फुलेका विभिन्न रंगका फूलहरूले सबैको मन भने अवश्य नै लोभ्याउने गदैछ । पाँच पोखरीमा हरेक वर्ष भदौ महिनाको एकादशीदेखि जनै पूर्णिमाको दिनसम्म मेला लाग्ने गर्छ। पूर्णिमाको दिन र रात भरि धामी–झाँक्रीको झाँकी हेर्न सकिन्छ ।

तामाङ समुदायको बाहुल्यता रहेको सो क्षेत्रमा स्थानीय भेषभूषा र भाषामा झाँक्री नाच हेर्न भने पाइन्छ । पाँच पोखरी, इन्द्रावती नदीको उद्गमस्थल पनि हो । यी पाँच पोखरी सबैका बेग्लाबेग्लै नाम छन्, भैरव कुण्ड, सरस्वती कुण्ड, गणेश कुण्ड, सूर्य कुण्ड र नाग कुण्ड । यस पोखरीको धार्मिक पक्ष खोतल्दै जाने हो भने स्कन्ध पुराणको हिमवत् खण्डमा पञ्चपोखरी नामको महान् तीर्थस्थलको वर्णन छ, जसलाई तीर्थराज प्रयाग र बाँडगंगा (कुरुक्षेत्र) समानका तीर्थस्थल भनिएको छ । पाँच पोखरीमा रहेको शिवको मन्दिरलाई मनोकांक्षा पूरा गर्ने मन्दिरको रूपमा लिइन्छ ।