विमानस्थलका कार्यालय व्यवस्थित गर्न समिति बन्न सक्ला तर, सुन प्रकरणको अनुसन्धान सीआईबीले गर्छः गृहमन्त्री

३ भदौ, काठमाडौं ।  उपप्रधान तथा गृहमन्त्री नारायणकाजी श्रेष्ठले त्रिभुवन विमानस्थलका सरकारी कार्यालयहरूलाई व्यवस्ति गर्न नीतिगत अध्यायनका लागि समिति बनाउन सकिने भएपनि  अहिलेलाई  सुन तस्करी प्रकरणको छानविन सीआईबीले नै टुंग्याउने बताएका छन् । उनले सीआईबीले गहन अनुसन्धान गरिरहेका बेला यसलाई प्रभाव पार्ने गरी अर्को समिति नबन्ने बताएका छन् । 

प्रधानमन्त्री पुष्पकमल दाहाल प्रचण्डले बोलाएको सर्वदलीय बैठकपछि गृहमन्त्री श्रेष्ठले तत्काल कुनै समिति नबन्ने बताएका हुन् । उनले संगठित अपराध अन्तर्गत अभियोजनका लागि ६० दिनको समय हुने, २० दिन राजस्व अनुसन्धान छानविनपछि जिम्मा लिएको र उसैले टुंगोमा पुर्याउने बताए ।  अभियोजनका लागि पाँच दिन सरकारी वकिलले लगाउने र बाँकी अवधिमा सीर्आबीले नै अनुसन्धान टुंग्याएर अभियोजन गर्ने उनको भनाइ छ । 

उनले त्यसपछि त्रिभुवन विमानस्थल, भन्सार कार्यालयहरू सबैलाई व्यवस्थित बनाउने सन्दर्भमा नीतिगत अध्ययनका लागि समिति बन्नसक्ने बताए । संसदको अवरोध खुलाउने विषयमा सर्वदलीय बैठकमा भएको छलफल सकारात्मक दिशातिर गएको उनले बताए । प्रमुख प्रतिपक्षी दलको नेता अस्वस्थताका कारण अनुपस्थित हुनु भएकाले ठोस निष्कर्षमा पुग्न नसकिएको भन्दै उनले सोमबारसम्ममा सकारात्मक निष्कर्ष आउँछ बताए । 

उनले सुन तस्करी प्रकरणको सम्बन्धमा सीआईबीले अनुसन्धान गरिरहेको र सीआईबीले नै अनुसन्धानलाई निष्कर्षमा पुर्याउने दाबी गरे । उनले भने, ‘मैले संसदमा सम्बोधनमै यो विषय प्रष्ट राखिसकेको हुँ, हामी कहाँ यस्तो सांगठनिक अपराधमा अभियोजनका लागि ६० दिनको समय हुन्छ । त्यसमध्ये राजस्व अनुसन्धानले नै २० दिनको समय गुजारिसकेको छ । अब बाँकी रहेको ४० दिन हो, त्यसमा पनि सीआईबीले नै काम गर्ने भनेको ३५ दिन मात्रै हो ।  मलाई लाग्छ, सीआईबीले नै यो प्रकरणलाई टुंगोमा पुर्याउँछ ।’