सुन तस्करी प्रकरणमा उच्चस्तरीय संयन्त्र नै बनाउनु पर्छः एमाले

३ भदौ, काठमाडौं ।  नेकपा एमालेले नेपाल प्रहरीको केन्द्रीय अनुसन्धान ब्यूरो सीआईबीको अनुसन्धानलाई प्रभावित नपार्ने गरी सुन तस्करी अनुसन्धान गर्न उच्चस्तरीय संयन्त्र बनाउन माग गरेको छ ।

आइतबार सिंहदरबारमा बसेको सर्वदलीय बैठकपछि प्रमुख प्रतिपक्ष दल नेकपा एमालेका प्रमुख सचेतक पदम गिरीले यस्तो बताएका हुन् । उनले पछिल्लो घटनाक्रम हेर्दै जाँदा नक्कली भूटानी शरणार्थी प्रकरणमा सरकारले दोस्रो चरणको छानबिन चलिरहेका बेला सरकारले फाइल खोल्छु भन्दै प्रहरीका अधिकारी सरुवा गर्ने काम गरेको बताए । 

उनले उच्चस्तरीय छानबिन समिति गठनको माग यथावत रहेको पनि बताए । गिरीले क्विन्टलका क्विन्टल सुन नेपाल भित्रिरहेको भन्दै छानबिन समिति गठन गर्न सरकार गम्भीर हुनुपर्ने बताए । उनले सरकारको अकर्मण्यताका कारण संसद अवरुद्ध भएको जिकिर गरे । सुन तस्करी प्रकरणमा राजनीतिक नेतृत्वहरुको पनि नाम सार्वजनिक भएको भन्दै ती व्यक्तिहरूलाई सीआईबीले छानबिनको दायरामा ल्याउन नसकेको बताए ।

उनले भने, ‘सुन तस्करी प्रकरणमा राजनीतिक व्यक्तिहरू पनि सहभागी छन् भन्ने कुरा विभिन्न मिडियाबाट सार्वजनिक भइरहेका छन् । ती मान्छेहरूलाई सीआईबीले छानबिनको दायरामा पनि ल्याउन सकेन ।’ सीआईबीको अनुसन्धान प्रभावित नहुने गरी उच्चस्तरीय छानबिन समिति नबन्दासम्म संसदमा बिजनेस अगाडि बढाउन नसकिने उनको भनाइ छ ।