सीआईबीले बुझाएन ललितानिवास प्रकरणको अनुसन्धान प्रतिवेदन

३ भदौ, काठमाडौं । बालुवाटारस्थित ललितानिवासभित्रको १४३ रोपनी सरकारी जग्गा हिनामिना प्रकरणमा पक्राउ परेकाहरु माथिको तयार पारिएको मिसिल (प्रतिवेदन) प्रहरीको केन्द्रीय अनुसन्धान ब्यूरोले आज बुझाएन । 

सीआईबीले ५५ दिनदेखि अनुसन्धान गरिरहेको र उक्त अनुसन्धानको मिसिल आइतबार जिल्ला सरकारी वकिल कार्यालय काठमाडौंमा बुझाउने तयारी गरेको थियो । 

सीआईबीले जग्गा हिनामिना आरोपमा भाटकटेनी सुपरमार्केका मालिक मिनबहादुर गुरुङसहित १८ जनालाई हिरासतमा राखेर ‘सङ्गठित किर्ते’ मुद्दामा अनुसन्धान गरिरहेको छ ।  ‘सगठित किर्ते’ मुद्दामा आरोपितलाई पक्राउ गरेको ६० दिनभित्र अदालतमा मुद्दा दर्ता गरिसक्नु पर्छ । 

प्रकरणमा हिनामिना सघाउ पुग्ने गरी मन्त्रिपरिषदबाट निर्णय गराएको भन्दै तत्कालीन प्रधानमन्त्री डा. बाबुराम भट्टराई र माधवकुमार नेपालमाथि अनुसन्धान गर्न सर्वोच्च अदालतले हालै दिएको आदेशलाई पूरा नगरीकनै सीआईबीले मिसिल बुझाउँदैछ ।