बयानको कागज बनाइयो तर प्रतिवादी बनाइएन

४ भदौ, काठमाडौं । चौतर्फी आलोचनापछि नेपाली प्रहरीको केन्द्रीय अनुसन्धान ब्यूरो (सीआईबी) ले बालुवाटारस्थित ललितानिवास र त्यसले चर्चेको सरकारी जग्गा हिनामिना प्रकरणका पूर्वप्रधानमन्त्रीद्वय माधवकुमार नेपाल र बाबुराम भट्टराईसँग बयान लिएको छ । आइतबार राति उनीहरूको निवासमै सीआईबीको टोली पुगेर बयान लिएको हो । 

प्रधानमन्त्रीद्वयसँग बयान नलिँदा फरारको सूचीमा राख्नुपर्ने र फरार सूचीमा राख्दा पछिसम्म असर पर्ने भनेपछि उनीहरूले सीआईबीलाई निवासमा बोलाएर बयान तयार गर्न लगाइएको हो । बाबुराम भट्टराईले आफूले बयान दिएको सामाजिक सञ्जालमा जानकारी दिएका छन भने नेपालसँग बयान लिएको सीआईबीले पुष्टि गरेको छ । 

मन्त्रिपरिषदबाट निर्णय गराउने मुख्य व्यक्तिसम्म अनुसन्धान गर्न सर्वोच्च अदालतले दिएको आदेश पालना नगर्दा अवहेलनाको मुद्दा लाग्न सक्ने भन्दै नेपाल र भट्टराईसँग बयान नगरी रायसहितको प्रतिवेदन सरकारी वकिल कार्यालयमा बुझाउन नसकिने अडान सीआईबीका अधिकारीहरूले लिएपछि प्रतिवेदन बुझाउनुअघि बयान लिएको हो ।

बयानको कागज गराए पनि मुद्दामा नेपाल र भट्टराईलाई प्रतिवादी नबनाइ प्रतिवेदन बुझाउन लागिएको छ । बयान नलिँदा फरारको सूचीमा राख्नुपर्ने र बयान लिएपछि प्रतिवादी बनाएर आवश्यक कारबाहीको प्रक्रिया अगाडि बढाउनुपर्ने हो । तर, सरकारी साक्षीका रुपमा राखेर प्रतिवादी नबनाइएको बताइएको छ । 

ललितानिवासको जग्गा हिनामिना प्रकरणमा सीआईबीले संगठित अपराध निवारण ऐन २०७० र मुलुकी ऐन २०२० को कीर्ते सम्बन्धी कसुर लगाएर अनुसन्धान गरिरहेको छ । अनुसन्धान प्रक्रिया टुंग्याउनु अघि सीआईबीले दुई निर्णायाधिकारीहरु पूर्वप्रधानमन्त्री भट्टराई र नेपालसँग बयानको कागज मात्र बनाएको हो ।