प्रदेशसभा बैठक सञ्चालनको जिम्मेवारी पाएका मन्सुरीले मत दिने भएपछि थापा नेतृत्वको सरकार सुरक्षित

४ भदौ, काठमाडौं । कोशी प्रदेशका मुख्यमन्त्री उद्धव थापाले विश्वासको मत लिने भएका छन् । प्रदेशसभा बैठकको अध्यक्षता गर्ने नेपाली कांग्रेसबाट निर्वाचित इसराइल मन्सुरीले पनि मत दिने भएपछि उनले विश्वासको मत पाउने भएका छन् । उपसभामुख सृजना दनुवारले मन्सुरीलाई सभा सञ्चालनको जिम्मेवारी दिएर काठमाडौं लागेपछि उनले ज्येष्ठ सदस्यका रुपमा बैठक सञ्चालन गर्ने भएका छन् । 

सत्तारुढ गठबन्धनको बैठकले मन्सुरीले बैठकको अध्यक्षता गरेपनि मुख्यमन्त्रीलाई विश्वासको मत दिने निर्णय गरेको छ ।  उनले मत दिँदा मुख्यमन्त्री थापाले विश्वासको मत पाउने छन् । उपसभामुखले बैठक स्थगित नगरी अनुपस्थित मात्र भएपछि विश्वासको मतमा असहयोग गरेको रूपमा सत्ता गठबन्धनले लिएको छ । 

कार्य व्यवस्था परामर्श समितिले आज दिउँसो ३ बजेका लागि बैठक राखेको छ । बैठकमा मुख्यमन्त्री उद्धव थापाले विश्वासको मत लिने माओवादी संसदीय दलका नेता इन्द्र आङ्वोले जानकारी दिए । माओवादी केन्द्रका प्रदेशसभा सदस्य गणेश उप्रेतीले पनि प्रदेशसभामा सत्ता गठबन्धनसँग ४७ मत रहेको र आइतबार सबै मत मुख्यमन्त्रीको पक्षमा खस्ने बताए ।

९३ सदस्यीय कोशी प्रदेशसभामा मुख्यमन्त्रीले आफूलाई प्रदेशसभाको विश्वास छ भन्ने प्रमाणित गर्न ४७ प्रदेशसभा सदस्यको समर्थन जुटाउनुपर्छ । तर एमालेबाट निर्वाचित उपसभामुख सृजना दनुवार काठमाडौं जाने भएपछि प्रदेशसभाको अध्यक्षता ज्येष्ठ सदस्यको रुपमा सत्ता गठबन्धनकै प्रदेशसभा सदस्यले गर्नुपर्ने भएको छ ।

प्रदेशसभाको अध्यक्षता गर्ने व्यक्तिले प्रदेशसभामा कुनै प्रस्तावमाथि मत बराबर भएमा मात्र निर्णायक मत दिन पाउने मत पनि छ । तर सत्ता गठबन्धनले भने सभाको अध्यक्षता गर्ने व्यक्तिलाई मुख्यमन्त्रीको पक्षमा मतदान गराउन लागेको हो ।