अपराधी पृष्ठभूमि भएकाहरु सांसद निर्वाचित भएर आएकाले संसदलाई अमर्यादित बनाउने काम भयोः ओली

४ भदौ, काठमाडौं । नेकपा एमालेका अध्यक्ष केपी शर्मा ओलीले अपराधी पृष्ठभूमिकाहरु भूलचुकले सांसदमा निर्वाचित भएर आएकाले संसदमा अमर्यादित अभ्यासको विकास भइरहेको बताएका छन् । उनले एमालेका सांसदले सुन तस्करीलागयताका विभिन्न घटनाहरुको बारेमा बोल्न खोज्दा सत्तापक्षले हल्ला गरेर बोल्नै नदिएको बताएका छन् ।  

पार्टी केन्द्रीय कार्यालय, च्यासलमा आयोजित एक कार्यक्रममा अध्यक्ष ओलीले संसद् माओवादीको झुट, बेइमानी र फट्याइँ बोल्ने थलो बनेको बताए । उनले सत्तापक्षले विपक्षी दलले बोल्न थालेलगत्तै होहल्ला गरेर संसदीय अभ्यासलाई अमर्यादित बनाएको दाबी समेत गरे । 

’हामी संसद् चलाऔं भन्ने चाहन्छौं तर, संसद् माओवादीको झुट, बेइमानी, फट्याइँ बोल्ने थलो भएको छ,’ ओलीले भने, ’सुन भनेर पित्तल चढायो भन्ने बकवास गर्ने थलो भएको छ । नचाहिने कुरा गर्ने थलो भएको छ । संसद् भनेको जनताको समस्या र सही र सत्य ल्याउने ठाउँ हो । देशको समस्या ल्याएको ठाउँ हो । गम्भीर समस्या ल्याउने थलो हो ।’

कार्यक्रममा उनले एमालेले नभइ सत्तापक्षले संसद अवरुद्ध पारिरहेको बताए । अहिले हामीले संसद् चल्न दिएन भनेर हल्ला चलाइएको छ, हामीले तस्करी रोक्न भनेका हौं, ओलीले भने । उनले त्रिभुवन भन्सार मात्रै नभएर देशका विभिन्न स्थानबाट भएको सुन तस्करीसहितको छानबिन माग गरिएको दाबी गरे । उनले भने, ‘हामीले छानबिन समिति बनाऔं भनेका छौं । सरकारले भने जे भन्यो त्यही मान्ने प्रहरीलाई अनुसन्धान गराउन खोजेको छ । प्रहरीले भनेको नमान्दा सरुवा गर्ने गरेको छ ।’

 उनले प्रायोजित रूपमा फाइलहरू खोलिने भनेर हल्ला चलाइएको पनि बताए । यसअघि एमालेले ओली प्रधानमन्त्री हुँदा पशुपतिमा चढाएको सुनको जलहरी पित्तल भएको भन्दै सत्तारुढका सांसदको आरोप लगाएपछि संसद् अवरुद्ध पारेको थियो । त्यसपछि सांसदको भनाइ संसदको अभिलेखबाट हटाउने प्रमुख दलबीच सहमति भएपछि अवरोध अन्त्य भएको थियो ।