म पनि लोकतन्त्रका लागि धेरै दुःख पाएको कार्यकर्ता हुँ, राजनीतिक रुपमा सक्रियता देखाउन खोजेको हैनः राष्ट्रपति

५ भदौ, काठमाडौं । राष्ट्रपति रामचन्द्र पौडेलले आफू लोकतन्त्रका लागि धेरै दुःख पाएको कार्यकर्ता भएकाले सक्रियता देखाउन नखोजेको बताएका छन् । उनले संविधानले दिएको अधिकारअनुसार संविधानको संरक्षण, पालना गर्ने बताएका छन् । बिहान शीतलनिवासमा बोलाएको सर्वदलीय बैठकमा उनले आफू सक्रिय हुन नखोजेको बताएका हुन् । 

संसदको अवरोध खुलाउन पहल गर्दै आएका राष्ट्रपति रामचन्द्र पौडेलले राजनीतिक दलहरुलाई बोलाएका थिए । सर्वदलीय बैठकमा उनले संविधानले दिएको जिम्मेवारीबारे जानकार रहेको बताए । उनले भने, ‘मैले एक्टिभिज्म देखाउन खोजेको होइन । म पनि लोकतन्त्रका लागि धेरै दुःख पाएको कार्यकर्ता हुँ । त्यसैले राष्ट्र प्रतिको यो मेरो चिन्ता हो । विभिन्न कारणले तपाईँहरू सबैसँग भेट पनि हुन सकेको थिएन । तपाईँहरूसँग भेटेर राष्ट्रको चिन्ता गरौं भन्ने पनि थियो ।’

संंविधानको पालना, संरक्षण  र राष्ट्रिय एकताको प्रवर्द्धन गर्ने जिम्मेवारी नेपालको संविधानले राष्ट्रपतिलाई दिएको भन्दै उनले भनेका छन्, ‘संंविधानमा रहेको यो जिम्मेवारी कसरी पुरा गर्न सकिन्छ भन्नेमा म सधैं चिन्तित रहेको छु ।’

सुन तस्करी प्रकरणमा उच्चस्तरीय छानबिन समिति गठनको माग गर्दै नेकपा एमालेले साउन १० गतेदेखि संसद अवरुद्ध गरेपछि राष्ट्रपति पौडेलले त्यसमा चासो राख्दै आएका छन् । उनले यसअघि प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली, सभामुख देवराज घिमिरे, राष्ट्रिय सभाका अध्यक्ष गणेशप्रसाद तिमिल्सिना, रास्वपाका सभापति रवि लामिछाने लगायतसँग शीतल निवासमा छलफल गरेका थिए ।