एमसीसी परियोजना रोक्ने वास्तोलाको चेतावनी

५ भदौ, काठमाडौं । भदौ १३ गतेदेखि पूर्णरुपमा कार्यान्वयनमा जान लागेको अमेरिकी सहयोग मिलेनियम च्यालेन्ज कर्पोरेसन (एमसीसी) कार्यान्वयन हुन नदिने चेतावनी क्रान्तिकारी कम्युनिष्ट पार्टीले दिएको छ । परियोजना अमेरिकाले आफ्नो सैन्य शक्ति विस्तारको योजनामा ल्याइएको उक्त पार्टीको दाबी छ ।

मंगलबार काठमाडौँमा भएको अन्तर्किया कार्यक्रममा उक्त पार्टीका नेता धर्मेन्द्र वास्तोला ‘कञ्चन’ले एमसीसी कार्यान्वयन रोक्न देशव्यापी विरोध प्रदर्शनसहित संघर्षका कार्यक्रम घोषणा गरे । 

‘अमेरिकाले नेपालमा सैन्य क्याम्प राखेर भारतलाई नियन्त्रणमा राख्ने र चीनलाई ध्वस्त पार्ने गरी एमसीसीलाई इन्डो–प्यासेफिक सैन्य रणनीति (आईपीएस) अन्तर्गत एमसीसी आएको छ । यसलाई खारेज गरेर राष्ट्रिय स्वाधीताको रक्षा गर्नुपर्छ’ वास्तोलाले भने । भोलि बुधबार एमसीसीविरुद्ध काठमाडौंमा प्रदर्शन गर्ने पार्टीले जनाएको छ ।

एमसीसी सम्झौता गर्ने काममा सहयोग गरेको भन्दै प्रधानमन्त्री प्रचण्डविरुद्ध सोमबार नेपालगञ्जमा उक्त पार्टीका कार्यकर्ताहरुले कालो झण्डा देखाएका थिए । प्रदर्शनका क्रममा आधा दर्जन कार्यकर्ता गिरफ्तार भएका थिए । उनीहरु हिजै रिहा भइसकेका छन् ।

कार्यक्रममा नेता सीपी गजुरेलले एमसीसी परियोजना लागू भए देशमा अमेरिकी सेनाको अखडा बन्ने बताए । विकासको नाममा विदेशी सेना आउन दिने कुरा सह्य नहुने उनले बताए ।

यो पनि पढ्नुहोस