दलहरुबीचको सहमतिपछि प्रतिनिधिसभा बैठक बस्दै

६ भदौ, काठमाडौं । दलहरुबीच सुन तस्करी छानबिनका लागि उच्च स्तरीय आयोग गठन गर्न सहमति जुटेसँगै आज दिउँसो ३ बजेका लागि बोलाइएको प्रतिनिधिसभाको बैठक बस्दैछ । केहीबरमै बैठक सुरु हुने संघीय संसद सचिवालयले जनाएको छ । 

सचिवालयले आजको बैठकको संभावित कार्यसूची समेत सार्वजनिक गरेको  छ । जसअनुसार मन्त्रालय जिम्मेवारी तोकिएको, प्रधानन्यायधीश नियुक्तिबारे राष्ट्रपति कार्यालयबाट आएको पत्र सुनाउने, एमालेका सांसद टोपबहादुर रायमाझीको सांसद पद निलम्बनमा परेको सूचना दिने लगायत कार्यसूची रहेका छन् ।
यस्तै, बैठकमा विभिन्न मन्त्रालयबाट विधेयकहरु पेस हुने पनि सचिवालयले जनाएको छ ।

कानुन,न्याय तथा संसदीय मामिला मन्त्री धनराज गुरुङ्गले नेपाल सरकार, मन्त्रिपरिषद्को निर्णयबाट आयोगको कार्यावधि थप गर्ने गरी जारी भएको आदेश बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ को उपदफा (२) बमोजिम सदन समक्ष पेश गर्ने सम्भावित कार्यसूची रहेको छ ।

शिक्षा विज्ञान तथा प्रविधि मन्त्री अशोककुमार राईले राष्ट्रिय सभामा उत्पत्ति भएको “नेपाल विश्वविद्यालय विधेयक, २०८० लाई दफावार छलफलको लागि सम्बन्धित समितिमा पठाइयोस्” भनी प्रस्ताव प्रस्तुत गर्ने, सभामुखले प्रतिनिधि सभा नियमावली, २०७९ को नियम २१३ को उपनियम (१) बमोजिम १० वा सो भन्दा बढी बैठकमा अनुपस्थितसदस्यहरुको अनुपस्थितिको सूचनाहरु सभाको स्वीकृतिको लागि पेश गर्ने लगायत विषय कार्यसूचीमा राखिएको छ ।

सुन तस्करी प्रकरण छानबिन गर्न प्रमुख प्रतिपक्ष एमालेले उठाउँदै आएको उच्चस्तरीय छानबिन आयोग गठन गर्न सरकार तयार भएपछि एमालेले पनि बैठक अवरुद्ध कार्यबाट पछि हट्ने  भएपछि बैठक आज बैठक बस्ने भएको हो । एमालेले गएको साउन १० गतेदेखि अवरद्ध पार्दै आइरहेको थियो । आजको संसद बैठक चल्न दिने सहमति भएको एमालेका प्रमुख सचेतक पदम गिरिले बताइसकेका छन् ।

यो पनि पढ्नुहोस