ललितानिवास जग्गा हिनामिनामा पूर्वप्रधानमन्त्री भट्टराई र नेपाललाई मुद्दा चलाउन संसद बैठकमा माग

६ भदौ, काठमाडौं । बुधबार प्रतिनिधिसभाको जारी बैठकमा प्रतिपक्ष दलका सांसदहरुले पूर्वप्रधानमन्त्री डा. बाबुराम भटट्राई र माधवकुमार नेपाललाई सरकारी स्वामित्वको ललिता निवासको जग्गा हिनामिना प्रकरणमा कानूनी दायरामा ल्याउन माग गरेका छन् । 

एमालेका सांसद योगेश भट्टराईले ललिता निवास जग्गा हिनामिना प्रकरणमा जग्गा खरिदबिक्री गर्ने व्यक्ति र कर्मचारीलाई मात्र पक्राउ गरी कारवाही सुरु गरेको तर जग्गा प्रकरणको सुरुवात हुने गरी मन्त्रिपरिषद बैठकबाट निर्णय गराउने तत्काली प्रधानमन्त्री डा. भट्टराई र नेपाललाई सामान्य तवरले बयान लिएर सरकारी साक्षीको रुपमामात्र खडा गरिएको भन्दै आपत्ति जनाए । 

उनले अनुसन्धान गरिरहेका प्रहरी अधिकारी अपराधी, भ्रष्टाचारी र तस्करका नजिक पुग्न लाग्दा सरकारले अधिकारीलाई नै सरुवा गर्ने र सत्ताका नजिक रहेका दोषीलाई जोगाउने काम भएको आरोप लगाए । सीआईबीको अनुसन्धान गर्ने गाडी अपराधी र दोषी नजिक पुग्नै लाग्दा सरकारले गाडी नै रोकेर फर्काउने काम किन गर्छ ?’ उनले प्रश्न गरे, ‘यसो हो भने दोषी सबैलाई सरकारले संरक्षण गर्ने हो ?’ 

उनले भेप र ब्रेक सुमा लुकाएर तस्करी भएको सुन तस्करीका दोषीलाई पनि सरकारले जोगाउने खेल रचेको आरोप लगाए । उनले सुन तस्करी प्रकरण छानबिन गठनका लागि सरकार तयार भएकोमा खुशी व्यक्त गरे । संसद सुचारु भएकामा उनले सरकारलाई धन्यवाद दिए ।

रास्वपाका सभापति समेत रहेका सांसद रबि लामिछानेले ललिता निवास जग्गा प्रकरण र नक्कली भूटानी शरणार्थीका दोषी सबैलाई कानूनी दायरामा ल्याउन माग गरे । नक्कली भूटानी शरणार्थी र ललितानिवास जग्गा प्रकरणमा सरकारले निष्पक्ष अनुसन्धान गर्न नखोजेको भन्दै सुन तस्करी प्रकरणको निष्पक्ष छानबिन लागि गठन गरिने भनी भएको सहमति कार्यान्वयन हुनेमा आशंका नरहेको भन्न नसकिने बताए । 

ब्रेक सुका लुकाएर भएको सुन तस्करीमा सरकारलाई पहिल्यै सूचना भएको तर त्यसमा सरकारका मान्छेहरु नसुनेझैं गरेर बसेको सूचना आफूसँग रहेको बताए । साथै उनले सुन तस्करीमा ठूला भनिने पत्रकारको समेत संलग्नता रहेको आधार आफू्रले दिन सकिने बताए । उनले संसद बैठक लामो समय मुख्य दलहरुले जुंगाको लडाईमा बन्धक बनाएको बताए । 

उनले बुबाहरुको मेहनतको बलमा सत्तामा बसेर नवयुवराजहरुले रवाफ देखाउने र जनताका करमाथि लुट मच्चाएको भन्दै त्यसलाई रोक्न सरकारको ध्यानाकर्षण गराए । ‘बाबुपुस्ताले गरेको आन्दोलनको आवरणमा नवयुवराजहरुले लुट मच्चाइरहेका छन्’ उनले भने ।

यस्तै राप्रपाका सांसद ज्ञानेन्द्र शाहीले नक्कली भूटानी शरणार्थी र ललिता निवास जग्गा प्रकरणमा सरकारले मुख्य दोषी तत्कालीन मन्त्रिपरिषदका अध्यक्ष माधवकुमार नेपाल र डा. बाबुराम भटट्राईलाई मुद्दामा प्रतिवादी नबाउनुका कारण बताउन प्रधानमन्त्री र गृहमन्त्रीसँग माग गरे । ‘प्रधानमन्त्रीज्यू, दुईवटा कानून बनाउँ, एउटा ठूला मान्छेलाई जस्तोसुकै अपराधमा कारवाही नचल्ने, सानालाई चाहिं चल्ने’ उनले भने, ‘होइन भने उहाँहरुकै निर्णयले जग्गा हिनामिना भएको छ ।’

उनले पोखरामा पृथ्वीनारायण शाहका शालिक तोडफोड गर्नेलाई कानूनी दायरामा ल्याउन माग गरे । इतिहास मेटाएर वर्तमान पुस्ताको भविष्य उज्यालो हुन नसक्ने भन्दै वीर पूर्खाको सम्मान गर्न सरकारले नसकेको बताए । 
उनले गाई काट्ने काममा संलग्नलाई पक्राउ गर्न समेत माग गरे ।