सेती नदी किनारमा मृत फेला परेकी रमा थापाको हत्या भएको आशंका

७ भदौ, काठमाडौं । मंगलबार सेती नदीको तनहुँको भिमादस्थित किनारमा मृत फेला परेकी पोखरा महानगरपालिका–३२ सात मुहाने देउरालीकी रमा थापाको हत्या भएको भन्दै आफन्तले श्रीमान गोपाल थापाविरुद्ध प्रहरीमा किटानी जाहेरी दिएका छन् । 

आइतबार बिहान हराएकी रमा नदी किनारमा नग्न अवस्थामा मृत फेला परेकी थिइन् । रमाको शरीरको केही भागमा ब्लेडले चिरेको जस्तो घाउ, टाउकाको पछाडिको भागमा रडले हानेको जस्तो चोट देखिएपछि हत्या भएको माइती पक्षले दाबी गरेका छन् । 

गोपाल विदेशमा बस्दा पठाएको पैसा स्वदेश फर्किएपछि खोजी गरेको र घर खर्च भएको बताउँदा रमालाई कुटपिट गर्ने गरिएको छिमेकीहरुले बताएको माइती पक्षको भनाइ छ । रमाको मृत्यु हत्याबाट भएको भन्दै घटनाको निष्पक्ष छानबिन र गोपाललाई कानूनबमोजम कारवाही हुनुपर्ने उनीहरुको माग छ । 

जाहेरी पक्षका मानिसहरुले पोस्टमार्टमका लागि शव राखिएको पश्चिमाञ्चल क्षेत्रीय अस्पताल हाल पोखरा स्वास्थ्य बिज्ञान प्रतिष्ठान परिसरमा प्रदर्शन गरेका थिए । आज पनि प्रदर्शन जारी राखेका छन् । गोपाललाई पक्राउ गरी घटनाको न्यायिक छानबिन नभएसम्म शव पोष्टमार्टम गर्न नदिने उनीहरुको भनाइ छ ।