प्रचण्ड र माधव नेपालहरु नेपाली जनतालाई नुवाकोटमा गोरु जुधाएजस्तो जुधाएर ताली बजाइरहेका छनः ओली

७ भदौ, काठमाडौं । प्रमुख प्रतिपक्षी नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले प्रधानमन्त्री पुष्पकमल दाहाल प्रचण्ड र एकीकृत समाजवादी अध्यक्ष तथा पूर्वप्रधानमन्त्री माधवकुमार नेपालमाथि गम्भीर आरोप लगाएका छन् । 

बिहीबार भक्तपुरको कौशलटारमा आयोजित नेपाल भूतपूर्व सैनिक तथा प्रहरी संगठनको कार्यक्रमलाई सम्बोधन गर्दै अध्यक्ष ओलीले प्रधानमन्त्री प्रचण्ड र पूर्वप्रधानमन्त्री नेपालमाथि साम्प्रदायिक हिंसा भड्काइरहेको गम्भीर आरोप लगाएका हुन् । कोशी प्रदेशमा प्रधानमन्त्री प्रचण्ड र अध्यक्ष नेपालले जनजातिहरू भिडाएर साम्प्रदायिक हिंसा भड्काउन खोजेको ओलीको आरोप छ । 

कोशी प्रदेशमा आन्दोलन गर्नेहरूमा प्रधानमन्त्री र अध्यक्ष नेपालका कार्यकर्ताहरू रहेको उनले उल्लेख गरे । द्वन्द्व भड्काउनका लागि प्रचण्ड र नेपालले कार्यकर्ताहरू भिडाउने काम गरेको भन्दै ओलीले एमालेले द्वन्द्व मच्चिन नदिने बताए ।

उनले भने, ‘अहिले पूर्वाञ्चलमा उत्पात मच्चाउने कसका कार्यकर्ता छन् भन्दा माओवादी प्रचण्डजीका कार्यकर्ता छन्, माधवकुमार नेपालजीका कार्यकर्ता छन् । उफ्रेका को छन् भन्दा राई, किराँत, लिम्बू भन्ने साथीहरू उफ्रिएका छन् । उफार्ने को छ भन्दा पुष्पकमल दाहाल, माधवकुमार नेपाल हुन् । नुवाकोटमा हुन्छ एउटा साढे जुधाउने भन्ने खेल । ती साँढेको केही दुश्मनी नै छैन । भेटेको पनि होइन, कहिल्यै । आफ्नो आफ्नो थलोबाट ल्याएर अखडामा भिडाउँछन् । अरू छेउमा बसेर ताली बजाउँछन् । प्रचण्ड र माधव नेपालहरु त्यसै गरेर नेपाली जनतालाई नुवाकोटको गोरु जुधाएजस्तो जुधाएर ताली बजाउन खोजिरहेका छन् ।’

अध्यक्ष ओलीले सरकारले ट्याक्सीमा भएका अभियुक्तलाई भगाएर सुन तस्करीमा आफै संलग्न रहेको प्रमाणित गरेको बताए । सुन नियन्त्रणमा लिने क्रममा सँगै ट्याक्सीमा रहेका हर्कबहादुर राईलाई बोलाएको बेला हाजिर हुनु भनेर सुन जम्मा पारिएको स्थानबाट अन्य व्यक्तिहरूलाई भगाउन सरकार लागेको उनले बताए ।

उनले भने, ‘एक क्विन्टल सुन तस्कर परेको थियो, ट्याक्सीमा । एयरपोर्टमा होइन बाहिर । ल्याउने, लाने गरेको ड्राइभर साथैमा छ । मेरो सामान भनेर बुझ्न जाने हर्कबहादुर राई त्यही ट्याक्सीमा छ । राजस्व अनुसन्धान विभागमा पुर्याएर एक क्विन्टल सुनसहित पक्राउ परेका अभियुक्तहरू लगेर फेरि खोजीका बखत हाजिर हुन्छु भनेर छोडे । किन छोड्यो, के भनेर छोड्यो, छिटो जाउ, सबलाई खबर गर, सामान लुकाउ, मान्छे भगाउ, तीन दिनपछि फेरि समात्छौँ भने । त्यसरी दुई जनालाई पठाए । अनुसन्धान भनेको त्यस्तै हुन्छ ?’

सुन तस्करी प्रकरणलाई लुकाउन गिरीबन्धु टी स्टेटमा आफ्नो संलग्नता हुँदै नभएको कुरालाई झिकेर जनतामा भ्रम छर्ने काम भइरहेको ओलीले बताए । सय केजी ६१ मा झरेको र यति मजाक गरिरहन, भ्रष्टाचारको यस कुरालाई लुकाउन गिरीबन्धु टी स्टेट खायो केपीले भने । झापामा गिरीबन्धु काे हो, मेरो होइन, मैले के गर्नु त, उनले भने ।