जुवाखालबाट पक्राउ परे मुस्ताङको घरपझोङ गाउँपालिका अध्यक्ष लालचन

८ भदौ, काठमाडौं । प्रहरीले जुवाखालबाट मुस्ताङका एक गाउँपालिकाका अध्यक्षसहित ७ जनालाई पक्राउ गरेको छ । पोखरा महानगरपालिका–८ सिर्जनाचोकस्थित होटल लक्ष्मीमा जुवा खेलिरहेको अवस्थामा घरपझोङ गाउँपालिका अध्यक्ष मोहनसिंह लालचनसहित ७ जना जुवाडेलाई पोखरा बैदमामका प्रहरी टोलीले बिहीबार साँझ रंगेहात पक्राउ गरेको हो ।

उनीहरुको साथबाट ४ लाख ४७ हजार ८० रुपैयाँ बरामद भएको प्रहरीले जनाएको छ । सुरुमा लालचनले सुरुमा प्रहरीलाई वास्तविक नाम ढाँटेपनि केरकार गर्दा सही नाम बताउँदै उनको परिचय खुलेको हो । 

पक्राउ पर्ने अन्यमा घोरपझोङका ५७ वर्षीय इन्द्रबहादुर कार्की, नवीप्रसाद थकाली, सिर्जनाचोकका शंकर ज्वारचन, पोखरा महेन्द्रपुलका गुञ्ज हिराचन, रामबजारका राजु गुरुङ र दलबहादुर हिराचन रहेका छन् । 

लाललचन गत वर्ष सम्पन्न स्थानीय तहको चुनावमा एमालेका उम्मेदवार सञ्जयकुमार थकालीलाई २ मतले पराजित गर्दै कांग्रेसबाट निर्वाचित भएका थिए । पक्राउ परेका सबैलाई थप अनुसन्धानका लागि शुक्रबार जिल्ला अदालत कास्कीमा पेस गरिने प्रहरीले जनाएको छ ।